Կարսը գտնվում է տնտեսական շրջափակման մեջ. միակ ելքը Հայաստանն է լինելու

Թուրքիայի Կարս քաղաքի գործարարները շարունակում են դժգոհել Հայաստանի հետ սահմանի փակ լինելուց, սակայն պարզվում է, որ Կարսը նաև տնտեսական շրջափակման մեջ է: 2011թ. ինն ամիսների ընթացքում Կարսի նահանգն իրականացրել է 948 դոլար ծավալով արտահանում, և հետաքրքիրն այն է, որ այդ ծավալի կեսը Կարսեցիները վաստակել են Գյումրիում տեղի ունեցած գյուղմթերքների մի ցուցահանդես-վաճառքի ժամանակ: Սա շատ ծիծաղելի թիվ է և անգամ համեմատելի չէ Թուրքիայի այլ սահմանամերձ նահանգների մի փոքրիկ ֆիրմայի արտահանման ծավալների հետ: Ինչպես տեղեկացնում է Hyetert կայքը՝ մեջբերելով Տաջեթին Դուրմուշի հոդվածից siyasalbirikim պարբերականում, այս վիճակը Կարսի Առևտրաարդյունաբերական պալատի անդամ գործարարը համարել է վիրավորական, իսկ Կարսի քաղաքապետ Նաիֆ Ալիբեյօղլուն հայտարարել է, որ Հայաստանի հետ սահմանի փակ պահելը նշանակում է խստագույնս պատժել Կարսեցիներին: «Ո՞ր մեղքի համար»,-հարցնում է քաղաքապետը:

Այսօր Թուրքիայի Կարս նահանգը միակ սահմանամերձ և սահմանային անցակետ ունեցող մարզն է, ով արտաքին առևտրի շրջանառություն չունի: Կարսեցիները դժգոհում են, որ Հայաստանի հետ սահմանը փակ է, և հայտնի էլ չէ, թե երբ կբացվի, այն դեպքում, երբ իրենք կարող էին այս տարի խոշոր եղջերավոր անասունների և գյուղմթերքների արտահանում կատարել Հայաստան, գրում է պարբերականը:

Armweeklynews.am –ի տվյալներով մինչև 2010թ. դեկտեմբեր ամիսը Կարսի օդանավակայանի հարակից տարածքում գտնվող հոլանդական և շվեյցարական պանիրների արտադրության ժամանակակից գործարանը միակ կազմակերպությունն էր, որը պանրի արտահանում էր իրականցնում: Սակայն 2011թ. ընթացքում ոչ մի կիլոգրամ պանիր չի արտահանվել սանիտարական պահանջների խստացման հետևանքով, և գործարանը փակվելու եզրին է, քանի որ դեպի Ստամբուլ և Անկարա արտահանումը տրանսպորտային տեսակետից ծախսատար է, և գործարանը չի կարողանում դիմանալ մրցակցությանը:

Կարսում թուրքական ապրանքների գները նույնն են, ինչ որ Երևանում: Կարսեցիներն էլ են գնում Ստամբուլ, ապրանքներ գնում և վերավաճառում իրենց քաղաքում: Գործազրկությունը մեծ չափերի է հասնում, և դեռևս 2010թ. Կարսի քաղաքապետարանի ուսումնասիրության արդյունքում պարզվել էր, որ օրական 20-ից 25 ընտանիք է արտագաղթում դեպի Թուրքիայի արևմուտք:

Կարսը վերածվել է փակուղու և դա հավասարազոր է տնտեսական շրջափակման:

Armweeklynews.am 21.11.11