Թուրքիան պետական մակարդակով նախապատրաստվում է թուրքական ժխտողականության հիմքերի ամրապնդմանը: Թուրքիայի արտաքին գործերի նախարարությունը որոշել է Ցեղասպանության հարյուրամյա տարելիցի նախօրեին մի պատվիրակություն ուղարկել Ռուսաստան` այնտեղի արխիվներում թուրքական ժխտողականության հիմքերն ամրապնդող նոր վավերագրեր հայթայթելու նպատակով:
«Ջումհուրիյեթ» օրաթերթի փոխանցմամբ` այդ նպատակով 2012 թ. առաջին ամիսներին Թուրքիայի արտգործնախարարության Ռազմավարական ուսումնասիրությունների կենտրոնից մի պատվիրակություն է ուղևորվելու դեպի Ռուսաստան:
Ինչպես թուրքական «Հաբերթյուրք» օրաթերթին հղում անելով` ավելի վաղ հայտնել էր Akunq.net-ը, Թուրքիայի արտաքին գործերի նախարարությունը Հայոց ցեղասպանության 100-ամյա տարելիցի՝ 2015 թ. կապակցությամբ ահազանգել էր դեռևս այս տարվա սեպտեմբերին, երբ շրջաբերական էր ուղարկել իր բոլոր դեսպանատներին: Արտաքին գործերի նախարարության կողմից հղված և «խիստ գաղտնի» կնիքը կրող այդ շրջաբերականում արտակարգ և լիազոր դեսպաններից պահանջվել էր պատրաստ լինել` Հայոց ցեղասպանության 100-ամյա տարելիցին՝ 2015 թ-ին: Շրջաբերականում, որում հիշեցվել էր, թե սփյուռքը համայն աշխարհում աշխատանքներ է տանում Ցեղասպանության ճանաչման ուղղությամբ, հաղորդվել էր նաև, որ դեսպաններից ակնկալվում է «սփյուռքի հետ սերտ շփումների մեջ մտնելով` արգելք լինել այդ գործողություններին»: Շրջաբերականով պահանջվել էր նաև, որ քարոզչություն արվի այն երկրներում տարվող բանակցություններում, որտեղ Թուրքիան ունի արտակարգ և լիազոր դեսպաններ:
22.11.2011
Akunq.net
Leave a Reply