Հայաստանի բարձրագույն ղեկավարությունը բազմիցս հայտարարել է, որ Հայոց ցեղասպանության իրողությունը կամ Հայոց ցեղասպանության միջազգային ճանաչման ու դատապարտման կարեւորությունը երբեք հարցականի տակ չեն դրվել եւ չեն կարող դրվել: Այդ մասին հայտարարել է Հայաստանի արտգործնախարար Էդվարդ Նալբանդյանը, ով Հաագայում նաեւ հարցազրույց է տվել հոլանդական հեղինակավոր De Volkskrant օրաթերթին: Պատասխանելով Հայոց ցեղասպանության միջազգային ճանաչման գործընթացի վերաբերյալ լրագրողի հարցին` Հայաստանի արտգործնախարարն ասել է. «1915 թ. վերաբերյալ պատմաբանների հանձնաժողով ստեղծելու մասին Թուրքիայի արտգործնախարարի հայտարարությունները, փաստորեն, փորձ են հարցականի տակ դնել Ֆրանսիայի, բազմաթիվ այլ երկրների եւ միջազգային կազմակերպությունների կողմից Հայոց ցեղասպանության ճանաչման փաստը: Դա ոչ այլ ինչ է, քան վտանգավոր ժխտողականության քաղաքականության շարունակություն, ինչի մասին Հայաստանում համապատասխան հստակ հայտարարություն էր արել Ֆրանսիայի նախագահ Նիկոլա Սարկոզին»:
Անդրադառնալով Թուրքիայի արտգործնախարար Ահմեդ Դավութօղլուի պնդումներին, թե 2005թ. Հայաստանի նախագահին հասցեագրված Թուրքիայի վարչապետ Էրդողանի նամակին այդպես էլ պատասխան չի տրվել, Նալբանդյանն ասել է. «Պետք է նշել, որ նախագահ Ռոբերտ Քոչարյանի պատասխան նամակը ուղարկվել եւ հրապարակվել է 2005թ. ապրիլի 25-ին: Թե միջազգային հանրությունը, եւ թե Թուրքիան լավատեղյակ են այդ նամակի բովանդակությանը, միգուցե բացառությամբ մի քանիսի, ինչպիսի եզրահանգման կարելի է գալ Ահմեդ Դավութօղլուի հայտարարությունից»:
21.11.2011
Leave a Reply