«Զարաքօլուն պետք է անմիջապես ազատ արձակվի». պահանջում են ասորի մտավորականները

Ստոկհոլմում մի խումբ ասորի մտավորականներ հայտարարություն են տարածել հայտնի հրատարակիչ, Հայոց ցեղասպանության դատի պաշտպան Ռագըփ Զարաքօլուի և այլ մտավորականների ձերբակալման առթիվ: Այդ մասին հաղորդում է «Էվրենսել» օրաթերթը:

Աղբյուրի համաձայն` այդ հայտարարության տակ դրված է նաև Թուրքիայում գործող Խաղաղություն և ժողովրդավարություն կուսակցության անդամ, Մարդինի պատգամավոր Էրոլ Դորայի ստորագրությունը: Հայտարարության մեջ մասնավորապես ասված է. «Դատապարտում ենք բոլոր գիտնականների, մտավորականների, գրողների, լրագրողների և քաղաքական գործիչների ձերբակալությունները` հարգարժան Ռագըփ Զարաքօլուի և դոկտոր, պրոֆ. Բյուշրա Էրսանլըի գլխավորությամբ, և պահանջում անմիջապես ազատ արձակել նրանց: Վերջին տարիներին կիրառվում է քուրդ քաղաքական գործիչներին, սոցիալիստներին և լրագրողներին լռեցնելու քաղաքականություն: Դոկտոր, պրոֆ. Բյուշրա Էրսանլըի և «Բելգե» հրատարակչատան ղեկավար Ռագըփ Զարաքօլուի ձերբակալությունները ցույց են տալիս, որ արդեն նշանառության տակ է նաև մտավորականությունը: Այսօր իշխանության ղեկին գտնվող կառավարությունը, ձգտելով այդ կերպ փակել հասարակության բոլոր շնչուղիները, բացահայտորեն հայտարարում է, որ հանուն խաղաղության և մարդու իրավունքների պայքար մղող յուրաքանչյուր նախաձեռնություն լռեցվելու է հենց նմանատիպ ազատազրկումներով: Այդպիսով Թուրքիան վերածվել է մի բացօթյա կալանատան, որում բանտարկված են լրագրողները, գիտնականները, գրողներն ու քաղաքական գործիչները: Զարաքօլուն տարիներ շարունակ ջանքեր է գործադրել` հանուն մարդու իրավունքների, հոդվածներ է հրապարակել` հանուն խաղաղության, և կատարել այդ հարցում իր վրա ընկած բոլոր պարտավորությունները: Հարգելի Զարաքօլուն «Բելգե» հրատարակչատան միջոցով հանդես է եկել խիզախ հրատարակություններով, որպեսզի լույս ընծայի ժողովուրդների ցեղասպանությունների մասին գրքեր: Իր այդ նախաձեռնությունների շնորհիվ Զարաքօլուն թե’ երկրի ներսում և թե’ արտերկրում շահել է ժողովուրդների մեծ համակրանքը: Բացարձակապես անընդունելի է այն մեղադրանքը, թե նման մտավորականը կարող է բռնությանը կողմնակից որևէ կազմակերպության անդամը լինել»:

Ըստ «Էվրենսելի»` վերոհիշյալ հայտարարության տակ ստորագրել են Խաղաղություն և ժողովրդավարություն կուսակցության անդամ Էրոլ Դորան, Շվեդիայի խորհրդարանի պատգամավոր Յըլմազ Քերիմոն, Հոլանդիայի բանվորական կուսակցության Ամստերդամ նահանգի պատգամավոր Աթթիյա Գամրին և բազմաթիվ մտավորականներ:

22.11.2011

Akunq.net