Թուրքիայի ընդդիմադիր Ժողովրդահանրապետական (CHP) եւ Ազգայնական շարժում (MHP) կուսակցության պատգամավորները օրակարգ են բերել այն պնդումը, թե խորհրդարանին պատկանող Աթաթուրքի պալատում հույները պատարագ են անցկացրել:
Թուրքական Vatan-ի փոխանցմամբ՝ Թուրքիայի խորհրդարանի ընդդիմադիր պատգամավորները հարցեր են ուղղել խորհրդարանի փոխնախագահին եւ գլխավոր քարտուղարին՝ հարցնելով, թե Հունաց պատրիարքի ընտրվելու կապակցությամբ ով է թույլ տվել նրանց պատարագ անցկացնել Աթաթուրքի պալատում: Խորհրդարանի փոխնախագահը նշել է, թե տեղյակ չէ թեմայից եւ պատասխան միանգամից չի կարող տալ, իսկ խորհրդարանի փոխքարտուղար Սադըք Յամաչը շեշտել է, թե հույները զբոսնել եւ ճաշել են Աթաթուրքի պալատում, իսկ պատարագի գաղափարը հանկարծակի է ծագել:
Այս խոսքերին արձագանքել է MHP-ի խորհրդարանական խմբակցության փոխնախագահ Օքթայ Վուրալը՝ նշելով, թե իշխանություններն Աթաթուրքի պալատը վերածել են քահանաների տան, իսկ մզկիթներն էլ եկեղեցիներ են դարձնում:
Այս հարցով պարզաբանում է տվել Հունաց պատրիաքարանի խոսնակը՝ շեշտելով, որ որեւէ պատարագ չի եղել: «Նախորդ շաբաթ խմբով խորհրդարանին պատկանող Աթաթուրքի պալատում նշել ենք պատրիարքի վերադարձի 20-ամյակը եւ 20 մոմով մի տորթ ենք կտել: Դրա առթիվ երգել ենք պատրիարքի կյանքին նվիրված հունարեն մի բանաստեղծություն: Դա պատաագ չի եղել: Պատարագի ժամանակ խաչ են հանում, իսկ մենք խաչ չենք հանել: Կարիք չկա դրա հետեւում այլ բան փնտրել»,-ասել է Հունաց պատրիարքարանի խոսնակը:
18.11.2011
Leave a Reply