Հրանդ Տինքի ապահովութիւնը երաշխաւորելու գծով իրենց պարտականութիւնը չկատարած պաշտօնատարներուն հարցը հետապնդող դատախազը որոշած է պաշտօնապէս հետախուզութիւն բանալ 30 բարձրաստիճան պաշտօնատարներու դէմ, որոնց թերացումներուն զոհ գացած է Տինք: Այդ մասին Նոյեմբեր 17ին հաղորդեց թրքական «Անատոլու» գործակալութիւնը։
Պաշտօնատարներուն շարքին են՝ Պոլսոյ նախկին կառավարիչ Մուամեր Կիւլեր, Պոլսոյ նախկին ոստիկանապետ Ճելելէտտին Ճարահ, որոնք Տինքի ընտանիքին կողմէ կ’ամբաստանուին իրենց տարրական պարտականութիւնը չկատարելու յանցանքով, հակառակ այն յստակ տեղեկութեանց, թէ Տինքի կեանքը վտանգուած էր:
Ըստ «Անատոլու»ի՝ ոճիրը կազմակերպողներուն եւ ապահովական մարմիններուն միջեւ կասկածելի կապերուն կողքին, ապահովական մարմինները կ’ամբաստանուին նաեւ փաստեր անհետացնելու յանցանքով:
Մարդկային իրաւանց եւրոպական ատեանը անցեալ տարի վճռած էր, թէ Թուրքիոյ իշխանութիւնները Տինքի կեանքը պաշտպանելու համար իրենց տարրական պարտականութիւնը չէին կատարած, նաեւ բաւարար լրջութեամբ չեն մօտենար ոճիրի պատասխանատուները բացայայտելու գործին:
18.11.2011
Tert.am
Leave a Reply