Թուրքիայում լույս է տեսել գրող, հրապարակախոս Ահմեդ Շիկի հեղինակած գիրքը: 125 գրողների, հրապարակախոսների եւ լրագրողների նախաձեռնությամբ եւ ստորագրությամբ Շիկի «Իմամի զորքը» գիրքը լույս է տեսել նոր` «000 գիրք» անունով:
Ստամբուլում բացված ամենամյա, թերեւս, ամենամեծ գրքի ցուցահանդես-վաճառքին բազմաթիվ հրատարակությունների շարքում առանձնանում էր գրքերից մեկը, որը դեռ չհրատարակված՝ արդեն մեծ աղմուկ էր բարձրացրել ողջ երկրում:
Այն դեռ ինն ամիս առաջ էր Ահմեդ Շիկի ձերբակալման պատճառ դարձել՝ Էրգենեքոն գաղտնի կառույցի շրջանակներում։ Ոստիկանությունն առգրավել էր դեռ չտպագրված գրքի համակարգչային՝ էլեկտրոնային տարբերակը: Դատախազությունը գնահատել է այդ գիրքն իբրեւ Էրգենեքոնի օգտին իրականացված քարոզչություն:
Ահմեդ Շիկը հայտնի է իր հետաքննական բացահայտումներով, այդ թվում՝ նաեւ Հրանտ Դինքի սպանության եւ ոստիկանության առնչությունների մասին աղմկահարույց հետազոտությամբ:
Նոր գրքի շնորհանդեսին ներկա Ահմեդ Շիկի փաստաբան Թորա Պեկին նշեց, որ գրքի էլեկտրոնային տարբերակը շուրջ 100 հոգու կողմից ներբեռնվել է, ինչի արդյունքում ակնհայտ է դառնում, որ գրքում տեղ գտած փաստերն ու տեղեկությունները որեւէ հանցանք չեն պարունակում, եւ այն ի պաշտպանություն որեւէ կառույցի չի գրվել:
Շնորհանդեսի սրահներում ամենուր կարելի էր տեսնել Ռագըփ Զարաքօլույի նկարով պաստառներ:
Ինչպես Զարաքօլույի, այնպես էլ Ահմեդ Շիկի ազատ արձակման համար գործընկերներն անում են հնարավոր ամեն ինչ: Դոցենտ Էսրա Այսանը, հիշելով 2 օր առաջ վարչապետ Էրդողանի՝ «Մեր երկրում կարելի է ազատ արտահայտվել եւ գրել» խոսքերը, նշեց, որ իրենց այս քայլը ստուգելու է վարչապետի խոսքերի անկեղծությունը:
Լրագրողներ Ալպեր Թուրգուտը, ով եւս իր ներդրումն ունի գրքի հրատարակության մեջ, նշեց, որ սա այլեւս խղճի հարց է դարձել իր համար եւ ասաց, որ շատ լրագրողների եւ հրապարակախոսների համար գիրքը հույսի շող է:
Գիրքը պաշտոնապես վաճառքում կլինի դեկտեմբերի 1-ից: Իսկ մինչ այդ շնորհանդեսին եւ ցուցահանդեսին ներկա ընթերցողները կեսկատակ-կեսլուրջ շշնջում էին մեկ բան. «125 գրողները թող պատրաստ լինեն։ Սա Թուրքիան է, ու հայտնի չէ` առավոտյան ինչ կլինի»:
Leave a Reply