ԵՄ-ի օրակարգ է բերվելու Թուրքիայում ասորիներին ազգային փոքրամասնության կարգավիճակ շնորհելու հարցը: «Ֆըրաթ» լրատվական գործակալության փոխանցմամբ` Շվեդիայի իշխանության մաս կազմող Քրիստոնյա դեմոկրատներ կուսակցության պատգամավոր Ռոբերտ Հալեֆը պահանջել է ազգային փոքրամասնության կարգավիճակ տալ Թուրքիայի ասորիներին: Ռոբերտ Հալեֆը շեշտելով, որ Շվեդիայում են բնակվում մոտ 100 հազար ասորիներ, Շվեդիայի խորհրդարանին ներկայացրած հարցապնդմամբ պահանջել է ԵՄ-ի շրջանակներում հանդես գալ թուրքաբնակ ասորիներին փոքրամասնության կարգավիճակ շնորհելու նախաձեռնությամբ:
Աղբյուրի համաձայն` նշյալ հարցապնդման մեջ ընդգծվում է նաև, որ 1900-ական թվականներ սկզբներին Թուրքիայում ապրել են 2 միլիոնից ավել ասորին, հայեր, հույներ և հրեաներ, ու նշվում. «Առաջին աշխարհամարտի տարիներին կոտորվել և իրենց հողերից աքսորվել են բազմաթիվ ասորիներ: Այսօր Թուրքիայում մնացել են ընդամենը 15 հազարի չափ ասորիներ»:
Հարցապնդման մեջ նաև անդրադարձ կա Մարդինի Միդյաթ գավառում գտնվող Մոր Գաբրիել ասորական վանքին պատկանող տարածքի բռնազավթմանը: Շվեդ պատգամավորը հարցապնդման մեջ նաև հայտնում է. «Այսօր Թուրքիայում ապրող քրիստոնյաները և ասորիները դժվարությամբ են պահպանում իրենց լեզուն, մշակույթն ու կրոնը: Նրանք ճնշումների են ենթարկվում իրենց հավատքի պատճառով: Թուրքական պետությունը, առանց իրավական հիմքի, սպառնում է քրիստոնյա փոքրամասնություններին և բռնագրավում նրանց գույքը: Նման մի օրինակ է Մարդինի Միդյաթ գավառի Մոր Գաբրիել վանքը: Չնայած դատարանը վճիռ է արձակել, որ այդ տարածքը պատկանում է եկեղեցուն, սակայն պետությունը դեռ ձգտում է խլել վանքապատկան այդ հողերը: Բացի այդ՝ ասորիները մայրենի լեզվով կրթություն ստանալու իրավունք չունեն»:
Ռոբերտ Հալեֆը, հարցապնդման մեջ նշելով, որ պետք է ասորիներին ևս շնորհել այն իրավունքները, որոնք տրված են Թուրքիայի հայերին, հույներին ու հրեաներին, պահանջել է, որ Շվեդիայի կառավարությունը սույն հարցը տեղափոխի ԵՄ-ի օրակարգ:
18.11.2011
Akunq.net
Leave a Reply