Արեւմտյան Հայաստան այցելած ռուսական գիտարշավի մասնակիցները կոչ են անում պահպանել համամարդկային արժեքները

«Անիի մայր տաճարը կարելի է համեմատել միայն Պետերբուրգի Իսահակի տաճարի հետ», – ասում է Սանկտ Պետերբուրգի պետական համալսարանի Արեւելյան ֆակուլտետի դեկան, պրոֆեսոր Եվգենի Զելենեւը: Գիտնականը վերջերս է եղել Անիում՝ համալսարանի գիտարշավի կազմում:

«Իբրեւ արեւելագետ՝ ուզում էի տեսնել` ինչպե՞ս են այս հողերի ներկայիս բնակիչները վերաբերվում այլոց պատմական անցյալին: Ինձ համար կարեւոր էր, թե ինչպե՞ս են պահպանվել եւ ինչպիսի վերաբերմունքի են արժանացել մշակութային կոթողները, որոնք սրբություն են նախկինում այստեղ ապրած մարդկանց սերունդների համար»,- նշում է Եվգենի Զելենեւը։

Սանկտ Պետերբուրգի պետական համալսարանի արշավախմբի անդամները սեպտեմբերի 15-21-ը յուրահատուկ շրջայց են կատարել Հայոց մայրաքաղաքներով, այցելել Երեւան, Վան, Անի, Կարս, բարձրացել Արարատ լեռը: Իսկ հոկտեմբերի 26-ին տպավորություններով կիսվել են «Սանկտ Պետերբուրգ» հեռուստաալիքի լսարանի հետ` ընդգծելով այցելած տարածաշրջանի գիտական նշանակությունը:

«Բացառիկ իրավիճակ է. մշակութային առումով Հայաստանի հետ միասնական մի տարածք, որը հայկական մշակույթի, քաղաքակրթության բնօրրանն է, ժամանակի ընթացքում անցել է Օսմանյան Կայսրության տիրապետության տակ: Այսօր էլ այնտեղ առկա է եկվոր էթնոս` քրդերը: Գլոբալ աշխարհի ընկալումը սկսվում է այսպիսի տարածաշրջանների ուսումնասիրությունից: Արեւմտյան Հայաստանին համարժեք վայր համարում եմ Երուսաղեմը, որը միշտ էլ եղել է ոչ թե մեկ ժողովրդի, այլ բազմաթիվ մարդկանց սեփականություն»,- տպավորությունները կիսել է Եվգենի Զելենեւը։

«Պետերբուրգյան հեռուստատեսություն» հաղորդման ընթացքում ցուցադրվեցին նաեւ արշավախմբին ուղեկցած օպերատորի նկարահանած կադրեր: Այդ նյութի հիման վրա 15-20 րոպեանոց ֆիլմեր են պատրաստվելու, որոնց հանդեպ մի շարք ալիքներ արդեն հետաքրքրություն են ցուցաբերել: Գիտնականները հուսով են, որ ֆիլմերը եւս կնպաստեն հուշարձանների պահպանության խնդրի վրա ուշադրության սեւեւռմանը:

«Կցանկանայինք համաշխարհային հանրության ուշադրությունը հրավիրել Արեւմտյան Հայաստանի հուշարձանների վերականգնման անհրաժեշտության վրա: Ցավոք, այն, ինչ տեսաք եւ հատկապես Անիի միջնաբերդը, չափազանց խարխուլ վիճակում են: Այս կոթողների հանդեպ ավելի մեծ ուշադրություն է անհրաժեշտ, քանզի դա քաղաքակրթության ժառանգություն է, որը պետք է պահպանվի»,- ասել է Սանկտ Պետերբուրգի պետական համալսարանի արեւելյան ֆակուլտետի դոցենտ Տիգրան Բալայանը։

Իրենց աշխատանքի հանդեպ Թուրքիայի հնարավոր ոչ միանշանակ արձագանքի մասին հարցին արշավախմբի ղեկավարը պատասխանում է:

«Ավելի շատ խնդիրներ է ստեղծում պատմության ինչ-ինչ էջերի մասին լռելը: Անկեղծ զրույցը, գուցե երբեմն ոչ այնքան հաճելի, շատ ավելի լավ է, քան լռեցնելը»,- ասել է Սանկտ Պետերբուրգի պետական համալսարանի ռեկտորի խորհրդական, պրոֆեսոր Ալեքսեյ Օբրազցովը։

20-րդ դարասկզբից ի վեր Արեւմտյան Հայաստան այցելած ռուսական առաջին գիտարշավի ղեկավարը հույս է հայտնում, որ նման նախաձեռնությունները կդառնան ավելի հաճախակի:

http://www.yerkirmedia.am/?act=news&lan=hy&id=3691