Ստամբուլի «Ակօս» շաբաթաթերթի գլխավոր խմբագիր Հրանտ Դինքի սպանության ուղղորդման մեջ մեղադրվող Յասին Հայալի հայրը սկանդալային բացահայտում է արել լրագրողներին։
Թուրքական Zaman-ի փոխանցմամբ՝ Դինքի սպանության գործով հերթական դատական նիստից դուրս գալուց հետո Յասին Հայալի հայրը հայտարարել է, թե Դինքի սպանությունից օրեր հետո Մարդինում ծառայող հետախուզության մի կապիտան իրեն շնորհավորական ուղերձ է հղել՝ նման որդի ունենալու համար։ Յասին Հայալի հայրը՝ Բահաթին Հայալը, պատմել է, թե երբ Դինքի սպանության գործով Տրապիզոնի ոստիկանությունում ինքը վկայություն է տվել, ոստիկանության ահաբեկչության դեմ պայքարի վարչության պետն ասել է, թե իրենք պետության եւ ժողովրդի համար են աշխատում։ «Յասինն էլ մեզնից մեկն է՝ պետության համար աշխատողներից մեկը։ Յասինը շատ շուտով կազատվի։ Այս պետությունը Յասինի նմանների կարիքն ունի»,-պատմել է Հայալի հայրը՝ շեշտելով, որ սրա մասին ինքը նախկինում պատմել էր գործը քննող դատախազին, սակայն իրեն ստիպել են չասել այդ մասին։
Նշենք, որ Հրանտ Դինքի սպանության մեջ մեղադրվող Օգյուն Սամասթը ցուցմունքում նշել էր, թե իրեն Հրանտ Դինքին սպանելու համար համապատասխան ցուցումներ է տվել Յասին Հայալը:
Leave a Reply