Նոյեմբերի 15-ին ՀՀ ԳԱԱ նախագահությունում մեկնարկեց «Անին միջնադարյան Հայաստանի քաղաքական և քաղաքակրթական կենտրոն» միջազգային գիտաժողովը: Գիտաժողովին կմասնակցեն Հայաստանի, Ռուսաստանի, Ֆրանսիայի, Իտալիայի, ԱՄՆ, Ավստրիայի առաջատար գիտնականներ: Նրանք զեկույցներ են ներկայացնելու` «Անիի դերը հայ մասնագիտացված երաժշտության պատմության մեջ», «Անի քաղաքի ճարտարապետությունը միջնադարյան շրջանի Առաջավոր Ասիայի երկրների քաղաքաշինության զարգացման համատեքստում», «Անիի ստորգետնյա բնակավայրերը», «Անիի ճարտարապետությունը» և այլ թեմաներով:
Գիտաժողովն աշխատանքները կշարունակի մինչև նոյեմբերի 17-ը: Այդ մասին Panorama.am-ը տեղեկացավ ՀՀ ԳԱԱ Տեղեկատվական-վերլուծական կենտրոնից:
Նշենք, որ գիտաժողովը կազմակերպվում է Անին Բագրատունյաց թագավորության մայրաքաղաք հռչակելու 1050-ամյակին նվիրված հոբելյանական միջոցառումների շրջանակում: Նշենք, որ այդ առիթով նախատեսված են նաև ցուցահանդեսներ ու այլ միջոցառումներ:
Անին Բագրատունյաց թագավորության մայրաքաղաք հռչակելու 1050-ամյակի նշումը նախապատրաստող հոբելյանական հանձնաժողով է ստեղծվել, որի նախագահն է ՀՀ ԳԱԱ նախագահ Ռադիկ Մարտիրոսյանը:
Անին մայրաքաղաք է հռչակվել 961 թվականին: Միջնադարյան Հայաստանի պատմության մեջ Անին բացառիկ դեր է կատարել ոչ միայն որպես երկրի քաղաքական ու հոգևոր կենտրոն` թագավորանիստ և կաթողիկոսանիստ, այլև քաղաքային կյանքի, տնտեսության, արհեստների ու առևտրի, մշակույթի և արվեստի զարգացման առաջնակարգ վայր: Պատահական չէ, որ այս քաղաքի պատմության և ընդհանուր մշակութային ժառանգության ուսումնասիրությունը հայագիտության մեջ առանձին անունով անիագիտություն է կոչվում:
15.11.2011
Panorama.am
Leave a Reply