Թուրքիան քրդերին ուզում է ծուղակը գցել

Մի կողմից Թուրքիան Հյուսիսային Քրդստանի վարչակազմի ղեկավար Մասուդ Բարզանիի միջոցով Քրդական աշխատավորական կուսակցությանն է ներկայացնում 23 կետից բաղկացած առաջարկություն զինադադարի և զինաթափման նպատակով , մյուս կողմից շուրջ` 2.5 մլրդ եվրո է հատկացնում հետախուզական և ոստիկանական ծառայություններին քուրդ զինյալների դեմ պայքարելու նպատակով:

Եփրատ գործակալության տեղեկացմամբ, անցյալ շաբաթ Թուրքիայում գտնվող Մասուդ Բարզանիի միջոցով Թուրքիան իր նախապայմաններն է առաջադրել Քրդական Աշխատավորական կուսակցությանը զինադադարի, զինաթափման և խաղաղություն հաստատելու վերաբերյալ: Առաջարկությունների փաթեթը բաղկացած է 23 կետից, որից առնվազն 8 կետը Թուրքիային հնարավորություն է տալիս խախտել համաձայնագիրը և ռազմական առավելություն ստանալ քրդական զինյալ ջոկատների նկատմամբ: Այդ կետերով պահանջվում է թուրք զինուժին Քրդստանում մշտական ներկայության կարգավիճակ տալ, համաձայնել ռազմավարական տեսակետից կարևոր Սորան և Բահդիման շրջաններում թուրքական ռազմակետեր կառուցելու նախագծին, Քրդստանի օդակայանների հսկողությունը հանձնել Ինտերպոլին և թուրքական հետախուզությանը:

Քրդական ազատագրական շարժման խորհրդի նախագահ Մուրադ Կարայըլանը պատասխանել է, որ «այո կամ ոչ» կարող է ասել միայն իրենց առաջնորդ Օջալանը, որի հետ արդեն երեք ամիս է՝ ոչ մի կապ չկա:

Սակայն հետաքրքիրն այն է, որ Թուրքիան Քրդական աշխատավորական կուսակցության զինյալ ջոկատբների հետ պայքարին տալիս է ազգային անվտանգության թիվ մեկ խնդրի կարգավիճակ, և ինչպես տեղեկացնում է Աքշամ պարբերականը, տարեկան 2.5 մլրդ եվրո մուտք ունեցող Պաշտպանության պալատի հիմնադրամի հաշիվներից օգտվելու թույլտվություն են ստանում նաև ոստիկանության վարձկան հատուկ ջոկատները և թուրքական MIT հետախուզական ծառայությունը: Դա ահռելի գումար է, որ պետք է ուղղվի քրդական աշխատավորական կուսակցության զինված ջոկատները վերացնելու ծրագրին:

Այժմ Պաշտպանության պալատի հիմնադրամի կանոնադրության մեջ փոփոխության օրենսդրական առաջարկությունը գտնվում է Թուրքիայի խորհրդարանում և, անկասկած, այն կհաստատվի: Եթե Թուրքիան զինադադար է ուզում Քրդական Աշխատավորական կուսակցության հետ, ապա ինչու է հապշտապ հարյուր միլիոնավոր եվրոների հատկացում կատարում երկու ուժային կառույցներին՝ PKK-ի դեմ գործողություններ իրականացնելու համար:

Քուրդ զինյալները զինաթափվեն-չզինաթափվեն, նրանց դեմ ռազմական պատժիչ գործողություններ է իրականացվելու: Թուրքիայի իշխանությունը կարծում է, որ անզեն քուրդ երիտասարդներին ավելի հեշտ է ոչնչացնել: Նման մի ծրագիր էլ նրանք իրականացրել են 1914-15թթ., երբ հայ տղամարդկանց բանակ զորակոչեցին, զինաթափեցին և կոտորեցին: Այժմ էլ նույն սցենարը փորձում են կիրառել քրդերի նկատմամբ:

16.11.11

Armweeklynews.am