Ստամբուլում Դերսիմի միությունների ֆեդերացիայի կողմից կազմակերպվել է 74 տարի առաջ մահապատժի ենթարկված Սեյիթ Ռըզայի եւ նրա ընկերների հիշատակին նվիրված երթ։
Fırat գործակալության փոխանցմամբ՝ Ստամբուլի Թաքսիմ հրապարակում հավաքվածները մոմեր են վառել եւ ծաղիկներ դրել Սեյիթ Ռըզայի եւ նրա ընկերների համար։ Հարգանքի տուրք մատուցելուց հետո ելույթով հանդես է եկել Դերսիմի միությունների ֆեդերացիայի նախագահ Օզքան Թաջարը՝ նշելով, որ 74 տարի առաջ Անկարայից պատվերով Դերսիմ ուղարկված դատավորը անմարդկային եւ անօրինական ձեւով մահապատժի ենթարկեց Սեյիթ Ռըզային եւ ընկերներին։ Նա մի քանի պահանջ է ներկայացրել` պնդելով, որ պետք է իշխանությունները հայտնեն Սեյիթ Ռըզայի եւ մյուսների գերեզմանների տեղը, վերադարձնեն Դերսիմ անունը (Ներկայում Դերսիմը վերանվանված է Թունջելի) եւ Դերսիմի ժողովրդից ներողություն խնդրեն։
Նշենք, որ 1937-1938 թվականներին Դերսիմի ապսամբությունը թուրքական իշխանությունները արյան մեջ են խեղդել՝ վերացնելով հազարավոր գյուղեր։ Տարբեր աղբյուրների հաղորդմամբ՝ Դերսիմի կոտորածներին զոհ է գնացել մինչեւ 100 հազար հոգի։
1915-ի Հայոց ցեղասպանությունից փրկված եւ Դերսիմի տարբեր գյուղերում պատսպարված հազարավոր հայերը 1938-ին կրկնակի ցեղասպանության ենթարկվեցին։
16.11.2011
Leave a Reply