Երկրաշարժից հետո Վանից արտագաղթի մեծ հոսք է սկսել

Թուրքիայի Վան նահանգում, հոկտեմբերի 23-ի ուժգին երկրաշարժից հետո, իշխանություններին չի հաջողվում ապահովել երկրաշարժից տուժվածների պահանջները, ինչի հետեւանքով Վանից արտագաղթի մեծ հոսք է սկսել։

Թուրքական Dunyabulteni-ի կայքի փոխանցմամբ՝ Վանից օրական արտագաղթում է 2-ից 2,5 հազար հոգի։ Այն բանից հետո, երբ որոշում կայացվեց, որ երկրաշարժից տուժվածները կարող են տեղավորվել Թուրքիայի այլ նահանգների հասարակական նշանակության տարբեր կառույցների պատկանող կացարաններում, Վանից հեռանալ ցանկացողների հսկայական հերթեր են գոյացել։

Նշվում է, որ միայն 2 օրում Վանից հեռանալու դիմում է ներկայացրել 70 հազար հոգի։ Թուրքիայի արտակարգ իրավիճակների վարչության ավտոբուսներն իրականացնում են երկրաշարժից տուժվածներին Վանից այլ նահանգներ տեղափոխումը։

Հիշեցնենք, որ հոկտեմբերի 23-ին դարձյալ Վանի նահանգում տեղի էր ունեցել 7,2 մագնիտուդով երկրաշարժ, որի հետեւանքով զոհվել էր  604, վիրավորվել ավելի քան  4 հազ. մարդ:

Լուրեր Հայաստանից – NEWS.am