Ստամբուլի «Ակօս» թերթի հայազգի խմբագրապետ Հրանտ Դինքի սպանության գործով հերթական դատալսումից առաջ դատարանի առջեւ հավաքված «Հրանտի ընկերները» խմբի մոտ 200 անդամներ հայտարարել են, որ Դինքին սպանողները պետության ներսում են, ինչն ապացուցող անթիվ փաստեր կան:
Ինչպես հաղորդում է «Արմենպրես»-ը` վկայակոչելով թուրքական «Սոնդաքիքա» լրատվական կայքը, խմբի անդամները Ստամբուլի Բեշիքթաշի դատարանի առջեւ «Հրանտի համար, արդարության համար», «Չենք մոռանալու», «Ֆաշիզմին դեմ մեր եղբայր Հրանտը», «Մարդասպան պետությունը հաշիվ պետք է տա» բովանդակությամբ պաստառներ են պարզել: Միջոցառմանը մասնակցել են Թուրքիա-Եվրամիություն խորհրդարանական հանձնաժողովի նախկին համանախագահ Ջուստ Լագենդիջկը, նախկին պատգամավոր Ուֆուք Ուրասը, Փարիզի փաստաբանների միության փաստաբանները:
Խմբի անունից Ումիթ Քըվանչը հայտարարել է. «Սա միայն ազգայնական զգացմունքներից գազազած երիտասարդների գործած հանցագործությունը չէ: Սա «Էրգենեքոն» կազմակերպության Տրապիզոնի բջջի գործն է: Հրանտի մարդասպանները պետության հսկողության տակ գտնվող մարդիկ են: Նրանց օգտագործել եւ ուղղորդել են պետության իրավասուները: Սպանությունից 4,5 տարի անց պետությունը դեռ դա չի հետաքննել: Դեռեւս անպատիժ են մարդասպանի հետ հերոսական կեցվածքով լուսանկարված ոստիկաններն ու ժանդարմները, ինչը դարձել է գործի անարդար դատավարության խորհրդանիշը: Հրանտին լռեցնելու համար սպառնալից հայտարարություն հրապարակած Թուրքիայի զինված ուժերի գլխավոր շտաբը, Հրանտի չասածների համար նրան դատապարտած եւ թիրախ դարձրած Վճռաբեկ դատարանը, ապացույցները թաքցրած ոստիկանությունը, փաստաթղթերի բովանդակությունը փոփոխած եւ խեղաթյուրած ժանդարմերիան եւ քրեական գործը խառնաշփոթ վիճակի բերած դատարանները բացահայտում են սպանության գլխավերեւում կազմակերպված պետական հովանոցի առկայությունը»:
14.11.2011
Armenpress.am
Leave a Reply