Ղարսի առևտրա-արդյունաբերական պալատի նախագահ Ալի Գյուվենսոյը շատ դժգոհ է մնացել Թուրքիայի տրանսպորտի նախարար Բինալի Յըլդըրմից, համարելով, որ սահմանային անցակետերի բացման վերաբերյալ նրա հայտարարությունների մեջ կողմնակալ վերաբերմունք կա: Անցյալ շաբաթ Ղարս էր ժամանել Թուրքիայի տրանսպորտի նախարարը և որպես բարի ավետում հայտարարել , որ Արդահանի նահանգում կբացվի Վրաստանի հետ Ակթաշ սահմանային անցակետը: Ալի Գյուվենսոյին դուր չի եկել այն փաստը, որ նախարարը ոչինչ չի ասել Հայաստանի հետ Դողու սահմանակետի բացման վերաբերյալ և Ղարսից բարի ավետում է հղել արդահանցիներին, տեղեկացնում է Կարսհաբեր կայքը:
Նա հայտարարել է, որ Ակթաշ սահմանային անցակետի բացումը ոչինչ չի տա ղարսեցիներին և այնպիսի տպավորություն է , որ Հայաստանի հետ սահմանը փակ է միայն ղարսեցիների համար: Նրա խոսքով, Տրաբզոնը , Արդվինը և Հոպան Սարպի անցակետով զարգացնում են իրենց առևտրային հարաբերությունները Հայաստանի հետ Վրաստանի միջոցով: Այժմ նման հնարավորություն կունենա նաև Արդահանի մարզը: Ստամբուլն էլ օգտվում է Երևանի հետ օդային կապից: Անթալիան նույն օդային կապով զարգացնում է զբոսաշրջությունը նաև հայերի հաշվին: Գյուվենսոյին զարմացնում է այն փաստը, որ Հայաստանի սահմանից հեռու գտնվող բոլոր մարզերը զարգացնում են առևտրա-տնտեսական հարաբերությունները Հայաստանի հետ, իսկ Ղարսը, որն ամենամոտն է Հայաստանին և անգամ սահմանային անցակետ ունի, զրկված է այդ հնարավորությունից:
Այնպիսի տպավորություն է, որ Լեռնային Ղարաբաղի խնդրի հետ կապված սահմանի փակման պետական քաղաքականությունը միտումնավոր միայն ղարսեցիների դեմ է կիրառվել, հայտարարել է Գյուվենսոյը:
Armweeklynews.am 13.11.11
Leave a Reply