Թուրք երիտասարդները Գերմանիայում արշավ են սկսել Հայոց ցեղասպանության մասին բանաձևի դեմ

Գերմանիայում գործող «Թուրք երիտասարդների միություն»-ը (ԹԵՄ-TGB) ստորագրահավաքի արշավ է սկսել ընդդեմ 2005 թվականին բունդեսթագում (Գերմանիայի Դաշնային Հանրապետության խորհրդարան) ընդունված Հայոց ցեղասպանության մասին բանաձևի: Ըստ թուրքական «Cumhuriyet» օրաթերթի` հիշյալ միությունը պահանջում է օրակարգ բերել այդ բանաձևը և հայտարարել չեղյալ:

«TGB» նախագահ Բեյհան Յըլդըրըմը լրագրողների հետ հանդիպման ժամանակ հայտնել է, որ իրենք նպատակադրվել են հավաքել 50.000 ստորագրություն և ուղարկել բունդեսթագի խնդրագրերի հարցերով զբաղվող հանձնաժողովին: Թուրք ակտիվիստները ծրագրել են այդ ստորագրությունների հետ միասին հիշյալ հանձնաժողովին ուղարկել նաև 1915 թվականին կատարվածի վերաբերյալ թուրքական ժխտողականությունը քարոզող երկու գիրք:

Հիշեցնենք, որ 2005 թվականի հուլիսի 16-ին բունդեսթագը միաձայն և առանց քննարկման ընդունել էր բանաձև` հետևյալ ձևակերպմամբ. «1915թ. ապրիլի 24-ի 90-ամյա տարելիցի կապակցությամբ հայերի հիշատակման օր. Գերմանիան պետք է աջակցի հայերի և թուրքերի հաշտեցմանը»: Բանաձևում բացակայում է «ցեղասպանություն» եզրաբառը: Փոխարենը նշվում է «բնաջնջում»:

http://www.panorama.am/am/politics/2011/11/11/germany/