Ռագըփ Զարաքօլուի համահեղինակությամբ նոր գիրք է հրատարակվել

Թուրքիայում ձերբակալված «Բելգե» հրատարակչության խմբագիր, Հայոց ցեղասպանության մասին բազմաթիվ գրքեր հրատարակած Ռագըփ Զարաքօլուի համահեղինակությամբ Հունաստանում օրերս լույս է տեսել Հույների ցեղասպանություն. Պոնտոսի զանգվածային հանցագործությունը» երկլեզու գիրքը:

Գրքի մյուս համահեղինակներն են թուրք գրող, մարդու իրավունքների պաշտպան Սաիթ Չեթինողլուն եւ ազգությամբ հույն Թեոֆանիս Մալկիդիսը: Վերջինը հույների, հայերի եւ ասորիների ցեղասպանությունները ճանաչած «Ցեղասպանագետների միջազգային ընկերության» անդամ է:

«Հույների ցեղասպանություն. Պոնտոսի զանգվածային հանցագործությունը» գրքում ներառված է մի քանի աշխատություն. «Թուրքիան եւ ժողովրդի ցեղասպանությունը» վերնագրով աշխատությունը հեղինակել է Ռագըփ Զարաքօլուն, իսկ Սաիթ Չեթինողլուին պատկանող աշխատությունը կոչվում է «Անկախության իդեալը եւ Պոնտոսի հույների ցեղասպանությունը»:

Հիշեցնենք, որ Զարաքօլուն ձերբակալվել էր Քրդստանի համայնքների միության դեմ իրականացված գործողության ժամանակ` Քրդստանի աշխատավորական կուսակցության հետ կապեր ունենալու մեղադրանքով:

http://www.yerkirmedia.am/?act=news&lan=hy&id=3573