Հակահայկական տեղեկատվության տարածումը նոր թափ է առնում. մանրամասներ թուրք Փերինչեկի գրքի վերաբերյալ

Հայոց Ցեղասպանության 100-րդ տարելիցի մոտեցմանը զուգահեռ` Ցեղասպանության վերաբերյալ ապատեղեկատվությունն ու տեղեկատվությունը մեծ ծավալների են հասնում: Վերջերս Ռուսաստանում  լույս է տեսել թուրք երիտասարդ գրող Մեհմեդ Փերինչեկի “Հայկական հարցը կազմված Ռուսական պետական արխիվների 120 փաստաթղթերից”  գիրքը:

Հայաստանի ազգային արխիվի տնօրեն Ամատունի Վիրաբյանը “Հենարան” մամուլի ակումբում այսօր խոսեց թուրք պատմաբանների կողմից Հայոց ցեղասպանության փաստերի նորագույն կեղծիքների մասին:

“Այս երիտասարդի գիքրը մեծ աղմուկ բարձրացրեց հատկապես Ադրբեջանում: Ադրբեջանական ողջ մամուլը պարզապես ողողված է այս գրքից մեջբերված նյութերով եւ հեղինակի հետ հարցազրույցներով: Թուրքիան ավելի զսպված վերաբերմունք ցույց տվեց”,-նկատեց “Հենարան” ակումբի հյուրը:

Բանախոսի ներկայացմամբ` գրքում տեղ է գտել մի տեղեկատվություն, թե Առաջին համաշխարհային պատերազմի ժամանակ տեղի է ունեցել ժողովուրդների բախում, որի արդյունքում տուժել են թե’ հայերը, թե’ քրդերը եւ թե’ թուրքերը: Այնուհետեւ գրողը ներկայացնում է 1900-ականների սկիզբը, թե իբր հայերը փորձել են էթնիկական զտում կատարել եւ ոչնչացնել բոլոր թուրքերին, ինչը կանխելու նպատակով թուրքական կառավարությունը ստիպված է եղել միջոցներ ձեռնարկել եւ ճնշել ապստամբությունը:

Գրքի հեղինակը նշում է, որ, այո, եղել է կոտորած, բայց կոտորվել են ինչպես հայեր, այդպես էլ` քրդեր եւ թուրքեր, եւ այդ ամենը եղել է ցարական Ռուսաստանի եւ իմպերիալիստական Եվրոպայի պատճառով:

Ամատունի Վիրաբյանը նշեց, որ չնայած գրքում նշված է, որ օգտագործված է 120 փատաթուղթ Ռուսաստանի արխիվից, սակայն դրանք ընդամենը 63- են, մնացած 57-ը ԽՍՀՄ-ի բոլշեւիկների, այդ թվում նաեւ հայ բոլշեւիկների կողմից  հրատարակած “սուտ փաստաթղթերն են”:

Բանախոսը նշեց, որ ռուսական պետական արխիվներում Հայոց ցեղասպանության մասին շատ փաստեր չկան, քանի որ այդ ժամանակաշրջանում Ռուսաստանը իր դիվանագիտական ներկայացուցիչը չուներ Թուրքիայում: Իսկ օրինակ ԱՄՆ, Գերմանիան, նույնիսկ Իսպանիան, ովքեր միշտ ունեցել են դեսպաններ եւ դիվանագիտական ներկայացուցիչներ, այսօր հսկայական արխիվ ունեն այդ տարիներին Թուրքիայում կատարված իրադարձությունների մասին:

Բանախոսը նաեւ նշեց, որ թուրքական վերոնշյալ գիրքը կազմված է մեծ խորամանկությամբ: Մեջբերված են ռուսական այնպիսի գրքեր, որոնք շատ քիչ տպաքանակով են եւ դրանք շատ դժվար է գտնելը: “Թուրք գրողը վերցրել ու մեջբերումների մեջ այնպիսի կրճատումներ է արել, որոնք փոխում են ռուսական փաստաթղթերի իմաստը”,-ասաց բանախոսը:

Վիրաբյանը նշեց, որ այսօր Ռուսական գրախանութներում առնվազն 10 հակահայկական գիրք կարելի է գտնել, որոնք մեծ թափով շատանում են ու կարողանում են սուտը տարածել:

“Այդ ամենին ի պատասխան մենք շատ բան չենք անում, բայց մինչեւ 2015-ը տպագրվելու է 3 հատորանոց “Վշտապատում”-ը, որը բաղկացած է 1916 թվականի հարցազրույցներից այն մարդկանց հետ, ովքեր մազապուրծ փրկվել էին կոտորածից: Անուններով նշվում են բոլոր  ոստիկանապետերն ու բեկերը: Արեւմտյան Հայաստանի միայն 3 նահանգ`Բիթլիս, Էրզրում, Վան, եւ դրանց 700 գյուղերի մասին է այդ գիրքը”,-տեղեկացրեց Ամատունի Վիրաբյանը:

Իսկ Փերինչեկի գրքի վերաբերյալ նաեւ Հայաստանի ազգային արխիվի տնօրենը պատրաստել է հոդված` “Հրաշք հայտնագործություն. Թուրքական մի նոր կեղծարարության մասին”, որը շուտով կհայտնվի համացանցում:

http://henaran.am/?p=49789