«Ալ Ջազիրան»` թուրքական «խորքային պետության» մասին

Ըստ թուրքական «Դունյա բյուլթենի» կայքէջի` «Ալ Ջազիրան» պատրաստվում է 4-սերիանոց վավերագրական ֆիլմ նկարահանել թուրքական «խորքային պետության» մասին: Նկարահանումները պատվիրված են թուրք ռեժիսոր Քորայ Դեմիրին: Ֆիլմի առաջին մասը կընդգրկի 1875-1909 թթ., երկրորդը` 1909-1944 թթ., երրորդը` 1944-2002 թթ., իսկ չորրորդը` 2002-ից մինչեւ մեր օրերը` բացահայտելով «Էրգենեքոն» ահաբեկչական կազմակերպության մութ ծալքերը:

Այսինքն, թուրքական «խորքային պետության» հիմքերը գցվել են դեռեւս 1875-ին օսմանյան շրջանում, որը շարունակել է գոյատեւել Քեմալ Աթաթուրքի հիմնադրած ժամանակակից Թուրքիայում: Կիսապաշտոնական «Անադոլու» գործակալության հարցերին պատասխանելիս ռեժիսոր Դեմիրը հույս է հայտնել, որ «խորքային պետության» մասին վավերագրական այս ֆիլմը «Ալ Ջազիրայի» էկրանին կհայտնվի առաջիկա գարնանը եւ արաբական այս հեռուստատեսության հատուկ ալիքի միջոցով կհեռարձակվի նաեւ Թուրքիայում:

Այնուհետեւ Քորայ Դեմիրն ավելացրել է. «Թուրքական «խորքային պետությունը» նման է մի շղթայի, որի օղակները միշտ եղել են կապակցված: Մենք բոլորս ուզում ենք ապրել ժամանակակից բարգավաճ եւ արդար երկրում: Ուզում ենք առանց վախենալու ե՛ւ ապրել, ե՛ւ արտահայտվել: Թեեւ ներկայում Թուրքիայում «խորքային պետությունը» հոգեվարքի մեջ է, սակայն դեռեւս շարունակում է գոյատեւել: Այդուհանդերձ հույս ունենք, որ վաղ թե ուշ «խորքային պետությունը» կլքի մեր երկիրը եւ այլեւս երբեք չի վերադառնա»:

Հ. Չ.

09-11-2011

«ԱԶԳ» ՕՐԱԹԵՐԹ #2011