Գերմանիայի Պոտսդամի համալսարանում կազմակերպված «Թուրքիայում 1915-1916 թվականների իրադարձությունները» անունը կրող կոնֆերանսի մասնակիցները քննադատել են թուրքական իշխանությունների կողմից հայտնի իրավապաշտպան, հրատարակիչ Ռագըփ Զարաքօլուի ձերբակալությունը եւ նրա ազատ արձակման համար որոշել են նամակ ուղարկել Թուրքիայի վարչապետ Ռեջեփ Թայիփ Էրդողանին։
Fırat գործակալության փոխանցմամբ՝ գերմանացի հայտի արեւելագետ, Հայոց ցեղասպանության մասին միջազգային հանրությանը առաջինը հայտնած անձանցից մեկի՝ Յոհաննես Լեփսիուսի թանգարանի կողմից Պոտսդամ քաղաքում կազմակերպված կոնֆերանսի մասնակիցների մեջ պետք է լիներ նաեւ Թուրքիայի «Բելգե» հրատարակչատան խմբագիր, Հայոց ցեղասպանության մասին բազմաթիվ գրքեր հրատարակած Ռագըփ Զարաքօլուն, ով օրեր առաջ ձերբակալվել է թուրքական ոստիկանության կողմից։
Կոնֆերանսի մասնակիցները ուշադրություն են դարձրել այն հանգամանքին, որ Ռագըփ Զարաքօլուն մեծ աշխատաքներ է տարել՝ Թուրքիայում Հայոց ցեղասպանության մասին իրազեկելու առումով, եւ նրա հրատակչության կողմից է տպագրվել Ֆրանց Վերֆելի «Մուսա լեռան 40 օրը» վեպը։ Հայոց ցեղասպանության հարցով զբաղվող գերմանացի գրող Ռոլֆ Հոսֆելդը շեշտել է, թե իրենք չէին սպասում, որ Զարաքօլուին կձերբակալեն։
Կոնֆերանսի մասնակիցները, որոնց մեջ էին նաեւ Ստամբուլի հայկական «Ակօս» շաբաթաթերթի գլխավոր խմբագիր Ռոբեր Քոփթաշը, Հրանտ Դինքի ընտանիքի փաստաբան Ֆեթհիյե Չեթինը, Րաֆֆի Քանթյանը եւ այլոք, որոշում են կայացրել՝ Ռագըփ Զարաքօլուի ազատ արձակման պահանջով Բեռլինում Թուրքիայի դեսպանատան միջոցով նամակ ուղարկել Թուրքիայի վարչապետին։
«Պահանջում ենք բացահայտել, թե ինչո՞ւ է ձերբակալվել Զարաքօլուն։ Մեզ նրա ձերբակալության համար առաջ քաշված վարկածը չի բավարարում։ Զարաքօլուն պետք է անմիջապես եւ առանց պայմանի ազատ արձակվի»,-հայտարարել են կոնֆերանսին մասնակից մտավորականները։
08.11.2011
Leave a Reply