Առաջիկայում Հայաստանի ազգային արխիվը կհրատարակի «Վշտապատում» անվանումը կրող եռահատոր մի ժողովածու, որտեղ ընդգրկված կլինի Հայոց Ցեղասպանությանը վերաբերող շուրջ 700 փաստաթուղթ: Այդ մասին այսօր լրագրողներին տեղեկացրեց Հայաստանի ազգային արխիվի տնօրեն Ամատունի Վիրաբյանը:
Նա տեղեկացրեց նաև, որ եռահատորը թարգմանվելու է ինչպես ռուսերեն, այնպես էլ անգլերեն ու գուցե նաև ֆրանսերեն, ամեն հատորը` 500 էջ:
Հիմնական փաստաթղթերը հիմնված են Արևմտյան Հայաստանի 700 գյուղերի փրկված բնակչության հիշողությունների վրա, որոնք հավաքագրվել են Հովհաննես Թումանյանի կողմից ստեղծված հատուկ հանձնաժողովի անդամների կողմից: Գրառումներում առկա են նաև լուսանկարներ, որոնք ևս կզետեղվեն ժողովածուի մեջ:
Ներկայացնելով այս տվյալներն` Ա.Վիրաբյանը հույս հայտնեց, որ եռահատորը կարող է նաև դրական ազդեցություն ունենալ Ցեղասպանության միջազգային ճանաչման գործընթացի վրա. «Թուրքերը պնդում են, որ հայերը չունեն այնպիսի փաստաթղթեր, որոնք ապացուցում են, որ դա եղել է հայ բնակչության կազմակերպված ոչնչացում և ոչ թե տեղահանում, ինչն իրենք ընդունում են: Այնպես որ, վստահ եմ, որ հատորների ռուսերեն ու անգլերեն լույս ընծայումը կնպաստի ճանաչման գործընթացին»,- ընդգծեց նա:
«Վշտապատում» անվանումը, ի դեպ, ոչ թե հատորյակի հեղինակների մտահղացումն է, այլ այն ծրագրի անվանումը, որի շրջանակում էլ 1916թ-ին հավաքագրվել են կոտորածներից փրկվածների հիշողությունները:
08/11/2011
Panorama.am
Leave a Reply