Ստամբուլի քաղաքապետարանը Յեշիլքյոյում տարածք է որոնում ասորական եկեղեցու համար

Պետությունը խոչընդոտում է ասորական համայնքի` Լոզանի պայմանագրով ձեռք բերած իրավունքների կիրառմանը, արդյունքում ասորական համայնքը չի կարողանում տեր կանգնել Ստամբուլի` բավական թվով իր եկեղեցիներին:

Ըստ «Ակօս» շաբաթաթերթի` խնդիրը կարգավորելու համար նախաձեռնությամբ հանդես եկած Ասորական ուղղափառ համայնքի վաքըֆի վարչական խորհրդի նախագահ Քենան Ալթընըշըքը հայտնել է, որ Ստամբուլի քաղաքապետարանը Յեշիլքյոյում տարածք է որոնում ասորական եկեղեցու համար:

Ստամբուլում բնակվող 17 հազար ասորիները միայն մեկ եկեղեցի ունեն: Ասորիները բացի այս եկեղեցուց,  համաձայն ստորագրած արձանագրությունների` կարող են պատարագ մատուցել նաև այլ համայնքներին պատկանող 7 եկեղեցիներում:

Ասորական ուղղափառ համայնքի վաքըֆի վարչական խորհրդի նախագահ Քենան Ալթընըշըքը ասորիների ծիսական արարողությունների խնդրի վերաբերյալ ասել է. «Միակ եկեղեցին, որի սեփականության իրավունքը մեզ է պատկանում, Թարլաբաշըի Սուրբ Աստվածածին եկեղեցին է, որ մետրոպոլիտության կազմում է: Բացի դրանից, Բաքըրքյոյում, Սամաթիայում, Յեշիլքյոյում, Քարաքյոյում, Գում Գափուում, Մոդայում և Իշխանաց կղզիներում եղբայր համայքների եկեղեցիներն են, որտեղ պատարագներ ենք մատուցում: Այսպիսով կարողանում ենք բավարարել ծիսական արարողությունների կարիքը»: 

Ալթընըշըքը հայտնելով, որ շատ եկեղեցիներում նեղություն չեն կրում, միայն Յեշիլքյոյի կաթոլիկ եկեղեցին քանի որ փոքր է, պատարագը ուշ սկսելու խնդիր է առաջանում, ասաց. «Ասորական համայնքը մեծամասամբ բնակվում է Յեշիլքյոյում: Մենք պատարագ ենք մատուցում այս թաղամասում գտնվող կաթոլիկ եկեղեցում: Համաձայն մեր դավանանքի` պատարագը պետք է առավոտ կանուխ սկսել, մինչդեռ այստեղ ժամը 11:00 ենք կարողանում սկսել, որի պատճառով տարեցներն ու երիտասարդները չեն կարողանում մասնակցել պատարագին: Բացի այդ, քանի որ եկեղեցին շատ փոքր է, չի համապատասխանում մեր պահանջներին»:

Ալթընըշըքը հայտնեց, որ Ստամբուլի քաղաքապետարանը և թաղապետարանին կից կառուցապատման հանձնաժողովը ասորական նոր եկեղեցու համար Յեշիլքյոյում տարածք է փնտրում. «Դեռևս հստակ պատասխան չեն տվել, սակայն մեր որոնումները շարունակվում են: Եթե լինի, շատ կուրախանանք, որովհետև մեր համայնքի կեսն ապրում է հենց այդ թաղամասում»:

05.11.2011

Akunq.net