Ռագըփ Զարաքօլուի կալանավորումը միջազգային արձագանք է գտնում

Հակոբ Չաքրյան

ԱՄՆ պետքարտուղարությունը արդար եւ թափանցիկ դատավարության կոչ է անում Թուրքիային:

Հոկտեմբերի 28-ին Ստամբուլում 47 մտավորականների թվում ձերբակալվեց Ռագըփ Զարաքօլուն, նոյեմբերի 2-ին ձերբակալվածներից 44-ին կալանավորեցին: Մինչ այդ, հոկտեմբերի 2-ին 96 թուրք եւ քուրդ մտավորականների հետ ձերբակալվել, ապա եւ կալանվել էր նրա որդին` Դենիզ Զարաքօլուն, ընդ որում` Թուրքիայի ազգային մեծ ժողովում 26 պատգամավորով ներկայացված «Խաղաղություն եւ ժողովրդավարություն» կուսակցության քաղաքագիտության ակադեմիայում «քաղաքականության փիլիոսոփայություն» դասավանդելու համար:

Նոյեմբերի 1-ին թուրքական Կալանված լրագրողների հետ համերաշխության պլատֆորմը դատապարտել էր Զարաքօլուի եւ մյուս մտավորականների կալանավորումը, իսկ Անկարայի մտքի ազատության նախաձեռնությունը կալանվածների ազատ արձակելու պահանջով կազմակերպել էր ստորագրահավաք: Հատկանշական է, որ դատապարտման տեքստի տակ բացակայում էին Հալիլ Բերքթայի, Մուրադ Բելգեի, Բասքըն Օրանի պես Հայոց ցեղասպանության թուրքական ժխտողականությանը հակադրվող հանրահայտ մտավորականների անունները:

Այդուհանդերձ Զարաքօլուի կալանավորմանը նոյեմբերի 2-ին արձագանքեցին Հրատարակիչների միջազգային ասոցիացիան` IPA-ն եւ Գրողների միջազգային միությունը` PEN-ը: Ավելին, IPA-ն «Կալանվեց հրատարակման ազատության հերոսը» վերնագրով հաղորդագրություն տարածեց, որտեղ մասնավորապես ասված է. «Հոկտեմբերի 28-ին Ստամբուլում ձերբակալված Թուրքիայում խոսքի ազատության եւ փոքրամասնությունների իրավունքների անխոնջ պաշտպան Զարաքօլուն այսօր, 28-ժամվա հարցաքննությունից հետո, կալանվել է: Ընդ որում նրա կալանքը իրականացվել է «ահաբեկչության դեմ պայքարի» օրենքի շրջանակում, ահաբեկչական կազմակերպությանն անդամակցելու մեղադրանքով: IPA-ն Զարաքօլուի կալանավորումը համարում է Մարդու իրավունքների եվրոպական կոնվենցիայի 10-րդ հոդվածի կոպիտ խախտում, ընդգծում է դրա անհամատեղելիությունը Թուրքիայի ստանձնած միջազգային պարտավորությունների հետ եւ անհապաղ պահանջում ազատ արձակել նրան»:

Հրատարակիչների միջազգային ասոցիացիան` IPA-ն, զգուշացրել է, որ Զարաքօլուի կալանավորման առնչությամբ դիմելու է ՄԱԿ-ում Թուրքիայի մշտական ներկայացուցչին: Ինչ վերաբերում է Գրողների միջազգային միությանը` PEN-ին, ապա այս կազմակերպությունն էլ, ընդգծելով խոսքի եւ հրատարակության ազատության համար Թուրքիայում մղվող պայքարում Զարաքօլուի միջազգային հեղինակությունը, եզրակացրել է. «Զարաքօլուն արժանի է Նոբելյան մրցանակի, այլ ոչ թե բանտարկության»:

Ի դեպ, հայ հասարակությանը քաջ հայտնի թուրք մտավորական Ռագըփ Զարաքօլուն կալանավորվել է PKK-ի քաղաքային թեւը հանդիսացող Քուրդիստանի բազմությունների միության` KCK-ի գործով: Այդ գործը գրավել է նաեւ ԱՄՆ պետքարտուղարության ուշադրությունը, որն էլ, ի դեմս խոսնակ Վիկտորիա Նյուլանդի, հանդես է եկել հայտարարությամբ: Նոյեմբերի 3-ին, ի պատասխան KCK-ի գործով կալանված թուրք եւ քուրդ մտավորականների մասին գրավոր հարցապնդման, Նյուլանդն ասել է, որ Մ. Նահանգները ոչ միայն Թուրքիայում, այլ աշխարհի բոլոր երկրներում պաշտպան է կանգնում խոսքի ազատությանը, ավելացնելով. «Ներկա պահին չենք ուզում որեւէ մեկնաբանություն տալ, սակայն դատական գործընթացի թափանցիկության ապահովման եւ ամբաստանյալների դատավարության արդար անցկացման կոչ ենք անում Թուրքիային»:

05-11-2011

«ԱԶԳ» ՕՐԱԹԵՐԹ #199

Leave a Reply

Your email address will not be published. Required fields are marked *

Վերջին Յաւելումներ

Հետեւեցէ՛ք մեզի

Օրացոյց

November 2011
M T W T F S S
 123456
78910111213
14151617181920
21222324252627
282930  

Արխիւ