Մարդինում բացվում է Արա Գյուլերի լուսանկարների ցուցահանդեսը

Այսօր` նոյեմբերի 3-ին, Սաքըփ Սաբանջըի անվան Մարդինի քաղաքային թանգարանում բացվում է պոլսահայ հայտնի լուսանկարիչ Արա Գյուլերի լուսանկարների ցուցահանդեսը: Այդ մասին հաղորդում է թուրքական NTV հեռուստատեսության լրատվական կայքը: Աղբյուրը հղում անելով Սաբանջըի անվան հիմնադրամից ստացված գրավոր հաղորդագրությանը` տեղեկացնում է, որ «Դիտի’ր Արա Գյուլերին Մարդինում» խորագրով սույն ցուցահանդեսում ընդգրկված լուսանկարները կցուցադրվեն երկու բաժիններով, որոնցից մեկը կկրի «Ճանաչել և հասկանալ», իսկ մյուսը` «Դեմ-դիմաց» վերնագիրը:  Ցուցահանդեսի բացմանը ներկա կգտնվի նաև Մարդինի նահանգապետ Թուրհան Այվազը:

Նշենք, որ Սաքըփ Սաբանջըի անվան Մարդինի քաղաքային թանգարանը 2 տարվա ընթացքում ունենում է մոտ 200 հազար այցելու:

Հիշեցնենք, որ համաշխարհային ճանաչում ունեցող Արա Գյուլերը 1951 թ. ավարտել է Կեդրոնական վարժարանը, իսկ լրագրությամբ սկսել է զբաղվել 1950 թ.` «Նոր Ստամբուլ» թերթում: Այս տարիներին պատմվածքներ է հրատարակել հայերեն թերթերում և գրական ամսագրերում: 1956 թ. դարձել է «Time life»-ի, իսկ 1958 թ. «Paris-Match» և «Stern» ամսագրերի` Մերձավոր Արևելքի ֆոտոթղթակիցը: 1961 թ. Անգլիայում լույս տեսնող «British journal of Photography Year book»-ը նրան ճանաչել է որպես աշխարհի ամենալավ 7 լուսանկարիչներից մեկը: 1962 թ. Գերմանիայում արժանացել է «Master of Leica» տիտղոսին: Հարյուրավոր ցուցահանդեսներ է բացել աշխարհի տարբեր ծայրերում: Լուսանկարել է բազմաթիվ հայտնի անձանց` Բերթրան Ռուսելից մինչև Վինսենթ Չերչիլ, Առնոլդ Թոյնբիից մինչև Պիկասսո և Սալվադոր Դալի: Լուսանկարների մեծ մասը հատուկ հավաքածուով ցուցադրվել է Փարիզում` Ազգային գրադարանում, ԱՄՆ-ում` Նեբրասկա համալսարանի Շելդոն հավաքածուում, նաև` Բոսթոնում, Չիկագոյում, Նյու Յորքում: Իր նկարները ցուցադրել է նաև Գերմանիայի Քյոլն քաղաքում` «Ludwig» թանգարանում ու «Das imaginarische» լուսանկարչական թանգարանում: 2006-ից լույս տեսնող «Հետք» ամսագրի  խմբագիրն է:

03.11.2011

Akunq.net