Հայկական «Ակօս» շաբաթաթերթը և «Ժամանակ» օրաթերթը կմասնակցեն Թուրքիայի նոր սահմանադրության քննարկումներին

Թուրքիայի Ազգային մեծ ժողովի նախագահ Ջեմիլ Չիչեքը ազգային փոքրամասնություններին պատկանող 4 պարբերականների, այդ թվում նաև` հայկական երկլեզու «Ակօս» շաբաթաթերթի և «Ժամանակ» հայկական օրաթերթի խմբագիրներին հրավիրել է մասնակցելու նոր սահմանադրության քննարկումներին:

Այդ մասին հաղորդում է թուրքական «Իհլաս» լրատվական գործակալությունը: Աղբյուրի համաձայն` ԹԱՄԺ-ի նախագահ Չիչեքը այդ նպատակով վաղը` նոյեմբերի 3-ին, Դոլմա Բահչե պալատում հանդիպում է ունենալու 4 թերթերի խմբագիրների հետ: Չիչեքն այդ հանդիպմանը հրավիրել է նաև 5 լրատվական գործակալությունների, որոնց շարքում է Թուրքիայի պետական լրատվական գործակալությունը` «Անադոլու»-ն, ինչպես և` 29 թերթերի գլխավոր խմբագիրներին ու 25 հեռուստաընկերությունների տնօրեններին:

Բացի «Ակօս» և «Ժամանակ» հայկական պարբերականներից՝ Թուրքիայի ազգային փոքրամասնություններին պատկանող մյուս թերթերն են հրեական համայնքի վերաբերյալ տեղեկատվություն մատուցող քաղաքական ու մշակութային շաբաթաթերթ «Շալոմը» և հունական համայնքին պատկանող «Ափոյեվմաթինի» օրաթերթը:

02.11.2011

Akunq.net