«Քահանան չի քննարկում մահվան պատճառները, իսկ ընտանիքը պարզաբանումներ է սպասում Թուրքիայի զինված ուժերից»:
Զինվորական ծառայության ժամանակ մահացած Թուրքիայի հայ քաղաքացի Սևակ Շահին Բալըքչըն Շիշլիում հողին հանձնվեց Սուրբ Վարդանանց հայկական եկեղեցում տեղի ունեցած թաղման արարողությունից հետո:
Բաթմանի Քոզլուք գավառի Գյումյուշորգյու ոստիկանական տեղամասում ծառայող Սևակ Շահին Բալըքչըն (25 տարեկան) 1915 թ. հայկական կոտորածների սկսվելու օրը` ապրիլի 24-ին, զոհվել էր որովայնի շրջանում ստացած հրազենի կրակոցից:
Բալըքչըի մահվան մասին ընտանիքին տեղեկացրել են դեպքից մոտ 5 ժամ անց, իսկ զոհվածի դիահերձման մասին զեկույցը դեռևս չի հրապարակվել:
Բալըքչըի թաղման արարողությանը մասնակցել են պետնախարար Էգեմեն Բաղըշը և Թուրքիայի զինված ուժերի անունից սպայի կոչում ունեցող 30 զինվորներ:
Ըստ քահանայի` մահվան պատճառներն անիմանալի են
Արարողության ժամանակ ելույթ ունեցած եկեղեցու քահանան ասաց. «Մարդու համար մատուցվող կրոնական արարողությունը խտրականություն չի դնում կրոնի և ազգության միջև: Մահվան պատճառներն անիմանալի են: Բալըքչըն գնացել է այն վայրը, ուր կանչվել է ծառայության ընթացքում: Հուսով ենք` այսօր միմյանց հասկանալու հույսի օրը կլինի»:
Բալըքչըի դին, որի զինծառայության ավարտին մնացել էր ընդամենը 15 օր, թուրքական դրոշի մեջ փաթաթված կերպով տարվեց` մտերիմների ուսերին դրված:
Բալըքչըի մահից հետո ընտանիքին արված պարզաբանման մեջ նշվել է, թե երբ զինվորները ցանկապատ էին բարձրացնում, զինվորներից մեկը փամփուշտով սպանել է Բալըքչըին: Մինչդեռ, մամուլում արված հրապարակման մեջ ասվել էր, թե նա «վախճանվել է կատակի արդյունքում տեղի ունեցած զենքի պայթյունի ժամանակ»:
Բալըքչըի մայրը հայտնել էր. «Ես չեմ հավատում, թե որդիս ապրիլի 24-ին մահացել է պատահական արձակված փամփուշտից: Այդ մեկնաբանությունը ոչինչ չի արտահայտում, որովհետև այնտեղի բարձրաստիճանների հիմնական գործն էլ հենց նման պատահականությունների կանխումն է: Թուրքիայի զինված ուժերը պարտավոր են որևէ պարզաբանում կատարել»:
Նիլայ Վարդար
Ստամբուլ- BİA լրատվական կենտրոն
http://bianet.org/bianet/azinliklar/129585-papaz-sebepleri-sorgulamiyor-aile-tskden-aciklama-bekliyor
Leave a Reply