Ջահերով երթ մինչև Ծիծեռնակաբերդ

ՀՅԴ-ն Երևանի կենտրոնից սկսեց ավանդական ջահերով երթը դեպի Ծիծեռնակաբերդ՝ ապրիլի 24-ին ընդառաջ: Այս տարի երթը մեկնարկեց ոչ թե «Ազատության», այլ նրա հարակից «Ֆրանսիայի հրապարակից»:

Ինչպես հաղորդում է yerkir.am կայքը, մինչ երթի մեկնարկը հավաքվածներին դիմել է ՀՅԴ Բյուրոյի անդամ Վահան Հովհաննիսյանը՝ նշելով, որ ջահերով երթը հայ ժողովրդի միասնականության խորհրդանիշն է, «իսկ կրակը մարմնավորում է հայ ժողովրդի ոգին և միասնականությունը, ինչպես նաև ժողովրդի հավերժական պայքարը»:

«Մենք պետք է սովորենք հարաբերվել թուրքերի հետ, նրանց հետ խոսել հավասարը հավասարի պես: Մեզ պետք չէ թուրքերի կեղծ ներողությունը, մենք իրական հատուցում ենք պահանջում»,- ասել է Հովհաննիսյանը՝ հավելելով, որ ջահերով երթը տարեցտարի ավելի ու ավելի շատ քաղաքներ է ներառում` Մոսկվա, Լոս-Անջելես, Թբիլիսի, Ստեփանակերտ և Հայաստանի 13 քաղաքներ:

Նա նշել է, որ Հայաստանի ներկայիս վիճակը բացասական բոլոր առումներով Ցեղասպանության հետևանք է: «Բայց հայ ժողովուրդը շարունակելու է պայքարել նոր հնարավորությունների և ապագայի համար»,- ասել է Վահան Հովհաննիսյանը:

24.04.11

Tert.am