Թուրքիայի ընդդիմադիր «Ժողովրդահանրապետական» կուսակցության առաջնորդ Քեմալ Քըլըչդարօղլուին հրատարակչության միջոցով վիրավորելու մեղադրանքով դատական գործ է հարուցվել «Դերսիմցի հայուհի Եմուշի որդի ինժեներ Քեմալը» գրքի հեղինակի դեմ։
Թուրքական Beyazgazete-ի փոխանցմամբ՝ Անկարայի դատախազության մամուլի հանցանքների գծով բաժնի դատախազ Քյուրսաթ Քայրալի կողմից բացված դատական հայցի մեղադրականում նշվել է, որ գրքի հեղինակ Սուլեյման Յեշիլյուրթը Քեմալ Քըլըչդարօղլուի մոր անունից եզրակացրել է, որ նա հայուհի է եւ դրա արդյունքում անհիմն եզրահանգումներ է արել։
Դատախազությունը պահանջում է գրքի հեղինակի համար 1 տարի 2 ամսից մինչեւ 2 տարի 4 ամիս պատժաչափ։
Ավելի վաղ Քեմալ Քըլըչդարօղլուն 100 հազար լիրայի չափով փոխհատուցման հայց է ներկայացրել եւ պահանջել, որ դատարանը գրախանութներից հավաքել տա «Դերսիմցի հայուհի Եմուշի որդի ինժեներ Քեմալը» գրքի օրինակները։
Հիշյալ գործով արդեն դատախազությունում ցուցմունքներ է տվել գրքի հեղինակ Սուլեյման Յեշիլյուրթը՝ նշելով, թե ինքը չի վիրավորել Քըլըչդարօղլուին։
Նշենք, որ հիշյալ գրքի վերաբերյալ իրենց քննադատական հայտարարություններ են արել նաեւ քրդական «Խաղաղություն եւ ժողովրդավարություն» կուսակցության պատգամավոր Հասիփ Քափլանն ու Շերաֆեթթին Հալիսը։
Շերաֆեթթին Հալիսը նշել էր, թե այդ գիրքը պատվիրված է, որն իր էությամբ ստորացուցիչ եւ անբարոյական մոտեցում է։ «Ես պարոն Քըլըչդարօղլուի փաստաբանը չեմ, սակայն այդ գիրքը վիրավորանքներով լեցուն է թե Քըլչդարօղլուի, թե հայերի հանդեպ»։
Հատկանշական է, որ գրքի տպագրման ամսաթիվը փետրվարի 20-ն է, սակայն այն աննկարագրելի արագությամբ հաջորդ օրը հայտնվեց Թուրքիայի խորհրդարանում։ Մեկ փաստ եւս՝ գիրքը տպագրվել է Անկարայի համար ռեկորդային համարվող 100 հազար տպաքանակով։
Ապրիլ 21, 2011
Leave a Reply