«Ասա` վե’րջ ցեղապաշտությանը և ազգայնականությանը» կազմակերպությունը /Irkçılığa ve Milliyetçiliğe Dur De/ անցյալ տարի առաջին անգամ Թուրքիայում` Ստամբուլում, կատարված Հայոց ցեղասպանության զանգվածային ոգեկոչումից հետո այս տարի ապրիլի 24-ին մեկ անգամ ևս Ստամբուլում, Իզմիրում, Անկարայում, Դիարբեքիրում ու Բոդրումում հիշատակելու է 1915 թ. իրականացված ցեղասպանության ժամանակ զոհված հայերին` «Այս ցավը բոլորինս է» կարգախոսով:
1915 թ. ապրիլի 24-ին թուրք-ազգային պետություն հիմնել ցանկացող իթթիհադականներն սկսել են Հայոց ցեղասպանությունը, 1 ու կես միլիոն հայեր ստիպողաբար հեռացվել են հարյուրամյակներ շարունակ իրենց ապրած հողերից և սպանվել:
Անցյալ տարի 95 տարի հետո առաջին անգամ զանգվածաբար հիշատակվել էին 1915-ի ցեղասպանության ժամանակ իրենց կյանքը կորցրածները, նրանց հիշատակը ոգեկոչվել էր Ստամբուլ. այնտեղ, որտեղից սկսվել էր ցեղասպանությունը:
«Ասա` վե’րջ ցեղապաշտությանը և ազգայնականությանը» կազմակերպության /Irkçılığa ve Milliyetçiliğe Dur De/ ղեկավարությամբ այս տարվա ոգեկոչման միջոցառումները կազմակերպվելու են հինգ քաղաքներում:
www.buacihepimizin.net համացանցային կայքում մեկնարկել է ստորագրահավաք, նաև ներկայացված է ապրիլի 24-ին կատարվելիք ոգեկոչման արարողություններին մասնակցելու կոչի ներքոհիշյալ տեքստը.
«1915 թ. ապրիլի 24-ը դարեր շարունակ այս երկրի մյուս ժողովուրդների հետ կողք կողքի ապրող հայ ժողովրդի դժբախտության սկսելու օրն է, աղետ, երբ հայ ժողովուրդը` կանայք, երեխաները, զառամյալներն ու հիվանդներն էլ ներառյալ, միայն հայ լինելու պատճառով պետության հարկադրմամբ հեռացվել են իրենց տներից, տեղերից, արտերից, աշխատավայրերից, արհեստանոցներից, մահացել, սպանվել, աքսորվել և ամեն տեսակի բռնության ենթարկվել: Այն տարիներից մինչ օրս պետությունն ու կառավարություններն աշխատել են այդ սարսափելի իրադարձությունը կոծկել, արհամարհել տալ այն` ասելով, թե նման բան չի եղել, ավելին` այն օրինականացնել այնպիսի պատճառաբանություններով, ինչպիսին է` ապստամբությունը: Այնինչ, այդ մահաբեր աքսորը, որը չի կարելի է արդարացնել և ոչ մի փաստարկով, մի բացահայտ ոճիր է` ուղղված մարդկայնությանը:
Սակայն պետք է ի նկատի ունենալ, որ
քանի դեռ պետությունը շարունակում է այդ հանցանքը ժխտելու վրա հիմնված պաշտոնական քաղաքականությունը, այն տարեթվից ի վեր այս երկրի մարդկանց սրտում գաղտնի կերպով արյունահոսող վերքը խորանում է, և ավելի շատ են կաթվածահար լինում մեր բանականությունը, խիղճը, իրավունքի և արդարության զգացումը: Այլևս պետք է վերջ տանք դրան: Այդ պատճառով բոլոր նրանց, ովքեր ցանկանում են, որ այս երկիրը դառնա ճակատները բաց, խիղճները մաքուր մարդկանց երկիր, հրավիրում ենք շատ ուշացած մի մարդկային պարտքի կատարմանը: Կոչ ենք անում մարդկության հիմնարար արժեքների շուրջ համախմբված բոլորին` հայտարարել, որ Ապրիլի 24-ի մատնանշած այդ ծանր ոճիրը մեր բոլորի ցավն:
1915 թ. ապրիլի 24-ից ի վեր մեր կորցրած հայ քաղաքացիների հիշատակն ենք ոգեկոչում մոմերով և մեխակներով»:
Այն վայրերը, որտեղ կազմակերպվելու են ոգեկոչման արարողությունները
Ստամբուլ
17:00-Թաքսիմի հրապարակ
Անկարա
17:00-Սաքարյայի հրապարակ
Իզմիր
14:00-Ֆուար Բասմանեի դռան առաջ
Դիարբեքիր /Տիգրանակերտ/
17:00-Մարդու իրավունքների այգում
Բոդրում
17:00-Քաղաքապետարանի շենքի առջև
20.04.2011
http://www.marksist.org/haberler/3485-24-nisanda-ermeni-soykirimi-anmalari-bu-aci-hepimizin
Leave a Reply