Բրիտանացի խորհրդարանականներն այցելել են Ծիծեռնակաբերդի հուշահամալիր

Մեծ Բրիտանիայի և Հյուսիսային Իռլանդիայի Միացյալ Թագավորության խորհրդարանի Բրիտանահայկական համակուսակցական խորհրդարանական խմբի նախագահ բարոնուհի Քերոլայն Քոքսի գլխավորած պատվիրակության անդամները ապրիլի 19-ին այցելել են Ծիծեռնակաբերդի հուշահամալիր, ծաղիկներ դրել Հայոց Մեծ Եղեռնի զոհերի հիշատակին, եղել են Ցեղասպանության թանգարանում, գրառումներ կատարել պատվավոր հյուրերի գրքում: Բարոնուհի Քերոլայն Քոքսը ջրել է այն եղևնին, որը տնկել էր 2002 թ.: Այս մասին հայտնում են ԱԺ-ից։

«Իմ զգացմունքները միշտ ձեր ժողովրդի հետ են: Մենք հիշում ենք 1915 թ. սարսափելի ու ողբերգական իրադարձությունները: Ինձ համար շատ հաճելի է, որ այսօր Հայաստանում ինձ հետ են և Լորդերի պալատի, և Համայնքների պալատի ներկայացուցիչները, ովքեր ներառված են բրիտանահայկական համակուսակցական խմբում: Մեզ համար շատ կարևոր է, որ մենք ոչ միայն Հայաստանում ենք, այլև մի նշանակալի վայրում, որը խորհրդանշում է այդ ողբերգական իրադարձությունները»,- Հայոց Մեծ Եղեռնի զոհերի հիշատակին ծաղիկներ դնելուց հետո նշեց բարոնուհի Քոքսը:

Լորդ Լինդոն Հարիսոնը, ով առաջին անգամ էր Հայաստանում, նշել է, որ բազմաթիվ երկրներում է այցելել ժողովուրդների հիշատակին նվիրված հուշահամալիրներ, սակայն այն, ինչ տեսավ Ծիծեռնակաբերդի հուշահամալիրում և Ցեղասպանության թանգարանում, ամենատպավորիչն էր:

«Մեր խորհրդարանական խումբը շատ մեծ ջանքեր է գործադրում, որպեսզի իրազեկի մարդկանց, թե ի՞նչ է Հայոց ցեղասպանությունը, ի՞նչ է տեղի ունեցել, քանզի շատ-շատերն իսկապես տեղյակ չեն դրանից: Փորձում ենք համոզել բրիտանական կառավարությանը, որպեսզի, եթե հնարավոր է, երբևիցե ճանաչվի Հայոց ցեղասպանությունը»,- հայտարարել է բարոնուհի Շրիլա Ֆլեդերը: Շիլան նշել է, որ Մեծ Բրիտանիայի կողմից Հայող ցեղասպանության ճանաչման ուղղությամբ առաջընթաց կա, բայց դեռ առկա են բազմաթիվ հարցեր:

Համայնքների պալատի անդամ Ջոն Ուիթինգդեյլն ընդգծել է, որ ինչպես շատերը Բրիտանիայում, այնպես էլ ինքը տեղյակ չի եղել Հայոց ցեղասպանությունից և այդ իմաստով նա կարևորել է այցը Ծիծեռնակաբերդի հուշահամալիր և Ցեղասպանության թանգարան: «Պետք է այնպես անել, որ նման դեպքերը երբևէ չկրկնվեն: Ես տիկին Քոքսի հետ մեկնելու եմ Ղարաբաղ, որպեսզի իմ աչքով տեսնեմ, թե ինչ է կատարվում այնտեղ, որպեսզի վերադառնանք Բրիտանիա և կարողանանք ասել, թե ինչ է իրականում այնտեղ տեղի ունենում»,- ասել է Համայնքների պալատի ներկայացուցիչը:

Tert.am

19.04.11