Թուրքիայի Սիվասի հայ հայմայնքի առաջնորդ Մինաս Դուրմազգյուլերի դեմ իրականացվելքի մահափորձի վերաբերյալ հարցերին պատասխանելու համար Ստամբուլի ծանր հանցագործությունների գծով 13-րդ դատարան է բերվել 2-րդ «Էրգենեքոն»-ի գործով անցնող մեղադրյալ, Թուրքիայի զինված ուժերի հատուկ նշանակության վարչության պետի նախկին տեղակալ Իբրահիմ Շահինը:
Թուրքական Anadolu-ի փոխանցմամբ` «Էրգենեքոն»-ի գործով անցնող առանցքային դեմքերից Իբրահիմ Շահինին բանտից բերել են դատարան, որտեղ նրան մոտ մեկ ժամ հարցաքննել է հատուկ իրավասություններով հանրապետական դատախազ Քասըմ Իլիմօղլուն:
Հարցաքննությունը կապված է եղել Սվասի (Սեբաստիա) հայ համայնքի առաջնորդ Մինաս Դուրմազգյուլերի դեմ իրականացվելքի մահափորձի մանրամասներին: Հարցաքննությունից հետո Իբրահիմ Շահինը կրկին բանտ է տեղափոխվել:
Նշենք, որ Իբրահիմ Շահինը «Էրգենեքոն»-ի գործով մեկ այլ մեղադրյալի՝ Էրսին Գյոնենջիի միջոցով հրահանգել էր Էմրահ Գյոնենջիին՝ իմանալ Սվաս նահանգի հայ համայնքի առաջնորդ Մինաս Դուրմազգյուլերի հասցեն՝ նրան սպանելու համար:
Հիշեցնենք, որ «Էրգենեքոնը» ենթադրյալ ահաբեկչական գաղտնի կառույց է, որի նպատակներից է եղել Թուրքիայում քաոս ստեղծելու միջոցով հեղաշրջում իրականացնել: «Էրգենեքոնի» ծրագրերի մեջ է եղել Պոլսո Հայոց պատրիարքի, Սեբաստիայի հայ համայնքի ղեկավարի սպանությունները կազմակերպելը:
Leave a Reply