Արգենտինացի դատավորը պաշտպանեց իր կայացրած վճիռը

Արգենտինացի դատավոր Նորբերտո Օյարբիդեն, որը վճիռ էր կայացրել, ըստ որի` Թուրքիան ցեղասպանության հանցագործություն է կատարել, իր մասնակցությամբ տեղի ունեցած մի ժողովի ժամանակ մեկնաբանեց այդ որոշումը:

Բուենոս Այրեսի հայկական համայնքի կողմից կազմակերպված դատական որոշման ընթերցման ժողովին ելույթով հանդես եկած Օյարբիդեն նշեց, որ այդ դատավճիռը կայացնելուց առաջ ինքը ուսումնասիրել է տարբեր երկրներից ուղարկված տասնյակհազարավոր փաստաթղթեր և այն ժամանակ Թուրքիայում ծնված տասնյակ վկաների վկայություններ: Օյարբիդեն հիշելով, որ միայն Գերմանիայից բերվել է 12 հազար վավերագիր, հայտնեց, թե 11 տարի տևած դատական գործընթացի ժամանակ իրենք աշխատել են ծանրաբեռնված ռեժիմով:

Քրիստինա Կիրխները շնրոհավորական ուղերձ էր հղել Օյարբիդեին

Ժողովում, որին մասնակցել են նաև Հայաստանի արտակարգ և լիազոր դեսպան Վլադիմիր Կարմիրշալյանը, Հայ առաքելական եկեղեցու` Չիլլիի և Արգենտինայի թեմերի առաջնորդ, արքեպիսկոպոս Գիսակ Մուրադյանը և Բուենոս Այրեսի հայկական համայնքի անվանի ներկայացուցիչները, ընթերվեցին Արգենտինայի նախագահ Քրիստինա Ֆերնանդես դե Կիրխների և Մարդու իրավունքների պաշտպան Էդուարդո Դուհալդեի` Օյարբիդեին հղած շնորհավորական ուղերձները:

Արգենտինայի քաղաքացի Գրեգորիո Հայրապետյանը 2000 թ., «ճշմարտությունն իմանալու իրավունքի» վրա հիմնվելով, Արգենտինայի դատարանում դատական գործ էր հարուցել, որպեսզի տեղեկություն ստանա 1915-1923 թթ. Սեբաստիայում, Խարբերդում և Ադանայում ապրող իր ազգականների ճակատագրի մասին: Դատական գործընթացի արդյունքում դատավոր Օյարբիդեն վճռել էր, որ Թուրքիան ցեղասպանական ոճիր է գործել:

Սույն դատավճիռը որևէ պատժամիջոց չի նախատեսում Թուրքիայի համար, սակայն հնարավորություն է տալիս հայկական կազմակերպություններին Արգենտինայի դատարանի վճիռը որպես ապացույց գործածել միջազգային ֆորումներում և դատարաններում:

Դողան լրատվական գործակալություն

10.04.2011