Իլհան Սելչուկի* ընտանիքի վերաբերյալ գաղտնիքը ջրի երես դուրս եկավ

Ազգայնականների շարքից կարևոր անուններից մեկի` Իլհան Սելչուկի արմատների վերաբերյալ պնդումները մշտապես քննարկման առիթ են եղել, սակայն մինչև օրս որևէ հստակություն չի մտցվել: Հասան Ջեմալը նրա մեծ գաղտնիքը ջրի երես հանեց:

«Միլլիյեթ» թերթի հոդվածագիր Հասան Ջեմալը, իր այսօրվա հոդվածում Իլհան Սելչուկին անդրադառնալով, ընթերցողներին է ներկայացնում Սելչուկի մոր հայ լինելու վերաբերյալ լուրը: Մոր հայ լինելու պատճառով Իլհան Սելչուկը իր մոր մահից հետո չի կարողացել մինչև վերջ սուգ պահել: Հարցի վերաբերյալ «Liberal ses»-ի լրագրող Թունջայ Օփչին գրել է. «Իլհան Սելչուկի վերաբերյալ տարբեր աղբյուրներից տարատեսակ լուրեր են ականջիս հասել, սակայն ոչ մի կերպ չեմ կարողացել ճշտել դրանց իսկությունը: Սելչուկը միլասցի էր: Նրա ծնողները Միլասից են եկել Գիրիթ: Եթե հարցը վերաբերում է Գիրիթին, չէին կարող չմտածել բեքթաշիների մասին: Եթե թեման բեքթաշիներն են, ապա ճանապարհներն ինքնըստիքյան տանում էին Սալոնիկ: Եթե տանում էին դեպի Սալոնիկ, ապա անմիջապես դռները բացվում էին այսօրվա Թուրքիայում չափազանց մեծ ժողովրդականություն վայելող սաբեթայիստների վերաբերյալ քննարկումների համար: Այս լուրն այնքան էլ չկարևորեցի: Ինձ այնքան էլ չէր հետաքրքրում Սելչուկի սաբեթայականությունը: Մինչև որ «Զաման» թերթի խմբագիր Էքրեմ Դումանլըն 2006 թ. մայիսի 11-ին Իլհան Սելչուկի վերաբերյալ հոդված գրեց: Դումանլըն ակնարկի միջոցով Սելչուկի արմատների մասին դիտարկմամբ հանդես եկավ: Փետրվարի 28-ին այս դիտարկումից իր բաժինը ստացավ նաև զորեղ փաշաներից Դողու Սիլահչըօղլուն: Կարդալով այս հոդվածը` սկսեցի անհամբեր սպասել Իլհան Սելչուկի հաջորդ օրվա պատասխանին: Հակառակ իմ սպասումների` հաջորդ օրը Սելչուկը հանգիստ պատասխան գրեց, բացի այդ՝ օսմանյան սուլթանների մայրերի վերաբերյալ հոդվածներ գրեց: Այսպիսով` Սելչուկը Դումանլըի հոդվածի վերաբերյալ քննարկում ծավալելու փոխարեն ավելի խելացի պատասխան գրեց»:

Ես Սելչուկի պատասխանը բավարար չհամարեցի: Նույնիսկ նրա պատասխանից հետո մտածեցի, որ նրան ուղղված պնդումները ճիշտ են: Հետո էլ իմ մի հայ ընկերոջից տեղեկություն ստացա, որը հաստատեց Դումանլըի գրածը: Իլհան Սելչուկի մայրը հայ էր, իսկ մորաքույրն ամփոփվել է Շիշլիի հայկական գերեզմանատանը: Համաձայն հայ ընկերոջս` Սելչուկն այս փաստից բարդույթավորվել և անցել է ազգայնականների կողմը:

Ճիշտն ասած՝ ես չեմ կարող հասկանալ, թե մարդու հայ, հրեա կամ թուրք լինելն ինչպիսի առավելություն կամ թերություն կարող է լինել: Նման բաներին ընդհանրապես նշանակություն չեմ տալիս: Այժմ մի ամսագրի ղեկավարն եմ, որը նրա կենսագրության վերաբերյալ տեղեկություն է տարածել: Իլհան Սելչուկի մոր հայ լինելու փաստը, որը ի հայտ է եկել Հասան Ջեմալի հոդվածով, ինձ համար լոկ Սելչուկի կենսագրության համար արժեքավոր տեղեկություն է, որից դուրս որևէ իմաստ չունի:

«Զաման», 05.04.2011

*Իլհան Սելչուկը (1925-2010) թուրք լրագրող-գրող է, ով լրագրողի կարիերան սկսել է թուրքական «Աքշամ» թերթում 1961 թ.: 1962 թ. աշխատել է «Ջումհուրիյեթ» թերթում` հետագայում դառնալով այս թերթի գլխավոր խմբագիրը: Սելչուքը Էրգենեքոնի դատավարության  շրջանակներում 2008 թվականին ձերբակալվել էր, սակայն ավելի ուշ ազատ էր արձակվել: Համարվում է Էրգենեքոն կազմակերպության գաղափարական առաջնորդը  (Խմբ.):