ԱԼԱՇԿԵՐՏ. գավառակ

Բարև Ձեզ, հարգելի ընթերցող
Ես, ինչպես գուցե շատերը, ջանում եմ գտնել իմ նախնիների արմատներն, ովքեր ծագումով Արևմտյան Հայաստանից են: Այդ ճանապարհին ես հանդիպել եմ մի դժվարության, որը հաղթահարելու նպատակով դիմել եմ այս կայքի օգնությանը, միաժամանակ, ավելորդ չեմ համարում խնդրանքիս էությունը հայտնի դարձնել կայքն այցելողներին: Ո*վ գիտե, գուցե նրանց մեջ կգտնվեն մարդիք, ովքեր տեղեկություն կունենան ինձ հետաքրքող հարցի մասին: Այսպես.
Իմ պապի-պապի հայրը, ում անունը Սահակ է եղել, մեր մոտակա նախնիների թողած տեղեկություններով ծագում է Ալաշկերտի շրջանի Դահար գյուղից: Մեզ հասած ավանդույթից գիտենք, որ նրա` Սահակի հայրական տան վրա, ինչ-որ մի հարազատի հարսանիքի ժամանակ, հարձակվել են թուրքերը /կամ քրդերը, չգիտեմ/ ակնհայտորեն թալանի, ավարառության համար: Տեղի է ունեցել կռիվ, զոհեր և այլն: Մարդիք փախել են տարբեր կողմեր: Այդ գերդաստանի հարսերից մեկի եղբայրը` Իփեկ /հավանաբար աղավաղված Եփրեմ անունն է/ անունով, գիշերը վերադառնում է գյուղ ու գտնում տունը թալանված, մարդիք սպանված: Սպանվածների մեջ նա գտնում է իր քրոջը, ում դիակի մոտ նստած լալիս է լինում նրա 4-5 ամյա որդին` Սահակը: Իփեկը վերցնում է Սահակին իր ձիու վրա ու միասին փախչում են Արևելյան Հայաստան:
Իմ հայտնաբերած /Հայաստանի արխիվից/ տվյալներից պարզվում է, որ Սահակը ծնված պետք է լինի 1785-87 թթ.: Հետևաբար այդ դեպքը տեղի է ունեցել 1787-90-ական թվականներին: Ճիշտ է այդ տարիներին դեռևս Արևելյան Հայաստանը Ռուսական Կայսրության կազմում չէր, սակայն հետագա արխիվային տվյալների համաձայն նրանք սկզբում տեղավորվել են նախկին Ալեքսանդրապոլի շրջանի Ղըզըլ Քիլիսա գյուղում, որը ներկայումս կոչվում է Հայկաձոր: Այնուհետև Սահակի երկու որդիները` Հովհաննեսը և Դանիելը` իրենց զավակներով 1864 թ. վերաբնակվել են դարձյալ նախկին Ալեքսանդրապոլի շրջանի Հաջի-խալիլ գյուղում, որը ներկայումս կոչվում է Ծաղկահովիտ: 1875 թ. ամբողջ գերդաստանով տեղափոխվել են դարձյալ նախկին Ալեքսանդրապոլի շրջանի Բուղդաշեն գյուղ, որը ներկայումս կոչվում է Բագրավան: Հովհաննեսը` Սահակի ավագ որդին, ով ծնվել է 1812 թվականին /այս տարեթիվը կարելի է ասել, որ ճշգրիտ է, քանի որ այն ես ստացել եմ արխիվից/, իմ պապի պապն է: Նրա ճյուղը շատ փարթամ է և ժառանգների մեծ մասը գրվում է Հովհաննիսյան ազգանունով:
Իմ մեծագույն խնդրանքը Ձեզ կայանում է նրանում, որ ինձ տրամադրեք առավել մանրամասն տեղեկություններ Դահար գյուղի մասին:
Իմ ավելի մոտ պապերին հայտնի էր, որ իրենք Ալաշկերտցիներ են:
Ես փաստորեն ուզում եմ ճշտել, թե ո*րն է եղել իմ ապուպապի հարազատ գյուղը: Ես լիովին վստահ չեմ, որ Սահակը ծագումով Դահար գյուղից է, քանի որ ավելի քան երկուհարյուր տարվա բանավոր պատմության մեջ, անշուշտ, հնարավոր են մոռացության հետևանքներ: Գուցե ձեզ իմ բերած պատմությունը ծանոթ կթվա, այդ դեպքում հուշեք ինձ այլ ուղի /գուցե այդ գյուղը Դիգորն է, քանի որ հնչյունով նա նման է Դահարին ու բավական մոտ է Ղըզըլ Քիլիսա գյուղին, բայց նա, ցավոք, Ալաշկերտի մարզում չէ/:
Հուսով եմ, որ որևէ տեղից կստանամ առավել հանգամանալի տեղեկություններ:

Հարգանքով Սուրեն Հովհաննիսյան: