Համշենցի Իսմեթ Շահինը՝ որպես անկախ թեկնածու Ստամբուլից

Սպասվում է, որ Թուրքիայում հունիս ամսին կայանալիք խորհրդարանական ընտրություններում տարբեր էթնիկ արմատներ ունեցող թեկնածուներին աջակցելու որոշում կայացրած Խաղաղություն և ժողովրդավարություն կուսակցությունը Ստամբուլի 2-րդ ընտրատարածքից կաջակցի հայ թեկնածուի: Անցյալ շաբաթ մամուլում շրջանառվող տեղեկությունների համաձայն` որոշ ժամանակ առաջ Ստամբուլի 2-րդ ընտրատարածքում հիշատակվում էր Հայկո Բաղդատի անունը, հիմա նշում են համշենահայ Իսմեթ Շահինին, ով ԽԺԿ-ի խորհրդի անդամ է:

Չնայած երիտասարդ հասակին` Շահինը մասնակցել է սոցիալիստական պայքարին, այնուհետև՝ Ժողովրդավարական հասարակություն կուսակցությունում, հետո էլ՝ ԽԺԿ-ում զբաղվել է քաղաքականությամբ, միևնույն ժամնակ աշխատանքներ է կատարում հայերենի վերաբերյալ: Շահինը նշելով, որ երբ զգացել է, որ համշեներենը արագությամբ մոռացվում է, իր 12 ընկերների հետ միասին որոշել են պատրաստել մի շարք գրքեր: Այս շրջանակում պատրաստել են համշեներեն-թուրքերեն, համշեներեն-հայերեն բառարաններ, պատմվածքների, երգերի, հավաքածուների գրքեր, ինչպես նաև նախատեսում են ստեղծել «ՀԱՏԻԿ» անվամբ միություն:

Շահինը հայտնեց, որ մեծ հավանականություն կա, որ 2011 թ. հունիս ամսին կայանալիք ընտրություններին ԽԺԿ-ի կողմից առաջադրվի որպես անկախ թեկնածու. «Միայն մեկ էթնիկ խումբ չէ, այլ նաև մյուս խմբերին է ներառելու, այսինքն` կուսակցության մեջ կա այնպիսի շեշտադրում, համաձայն որի` թող լինի մեկը, ով կարողանալու է պաշտպանել  Թուրքիայում և’ ձախակողմյան շարժումը, և’ հայերի, ասորիների ու մյուս էթնիկ խմբերի շահերը: Նրանք ցանկացան մեկին, ով միևնույն ժամանակ մոտիկից ծանոթ է քրդական ազատագրական պայքարին, ինտերնացիոնալիստական համերաշխության կրողն է: Այս առումով իմ անունը գերակշռել է»:

Շահինը նշելով, որ լեզվի վերաբերյալ կատարած աշխատանքների հետևանքով մոտիկից հետևել է  հայ համայնքին, քաջ ծանոթ է նրանց խնդիրներին, ասում է, թե նրանք, ովքեր իրենց նեշնչում են, թե «անհրաժեշտ է ԱԶԿ-ին շնորհակալ լինել», սխալվում են: Շահինն ասաց. «Որպեսզի հասկանան, թե ինչ է ԱԶԿ-ը, բավական է նայել Ջեմիլ Չիչեքի փաստարկներին: Նա հայություն բառն օգտագործում է որպես հայհոյանք: Փաստացի իրավիճակը ցույց է տալիս, թե ինչ է ԱԶԿ-ը: Միայն սեփականության մեր իրավունքը մեզ վերադարձնելու համար երախտապարտ ենք լինելու ասելու, թե մեր ունեցվածքը մե՞զ վերադարձրեց: Իսկ մեր պատմական խնդիրների հետ ի՞նչ է լինելու: ԱԶԿ-ն փորձում է ստեղծել իր հային, իր հույնին և իր քրդին: Անհրաժեշտ է տեսնել այս կեղծարարությունը: ԱԶԿ-ն այն  կուսակցությունն է, որը, յուրացնելով անցյալի էտատիզմի ավանդույթները, ամեն մի հարմար առիթով այն նորացնում է»:

Շահինն ասելով, որ հայ պատգամավոր լինելն ինքնին շատ բան չի նշանակելու, այն տեսակետի ջատագովն է, համաձայն որի` անհրաժեշտ է, որ ոչնչացված և ճնշված համայնքները միասին պայքարեն: Շահինը նշում է. «Անհրաժեշտ է, որ բոլոր ճնշված համայնքները համատեղ պայքարեն: Մեր պահանջները նույնն է, որովհետև ոչնչանում ենք: Արդեն կարիք չկա, որ մշակույթները ձուլելու համար պետությունը որևէ բան ձեռնարկի: Գոյություն ունեցող համաշխարհային կենսաձևը, կապիտալիստական հասարակարգը, ապրանքաշրջանառության համակարգը մարդկանց ցաքուցրիվ է անում: Քաղաքային կյանքը մեզ միմյանցից օտարացնում, անհատականացնում է և մեր սոցիալական հարաբերությունները ոչնչացնում: Եթե սրանք չլինեն, անհնար կլինի վերաստեղծել այս համայնքների ինտելեկտուալ հարստությունը: Պետք է միասին ստեղծենք այն ժողովրդավարական Թուրքիան, որից օգուտ կստանա ամեն մի համայնք»:

«Ակօս», թիվ 782