Որտե՞ղ են ինձ «Ակօս» հասցնողները

«Ակօս» շաբաթաթերթի գլխավոր խմբագիր Հրանտ Դինքի մարդասպան, կասկածյալ Օգյուն Սամասթը երեկ անչափահասների դատարանում ընթերցեց իր պաշտպանական ճառը, որը գրել էր նամակի տեսքով: Սամասթն ասելով, թե այս հանցագործությունը կատարելիս խելքը գլուխը չի եղել, և որ իրեն ահաբեկել է Յասին Հայալը, իր կողմից կատարված սպանության մեջ էլ մեղադրեց թուրքական լրատվամիջոցներին: Սամասթն ասաց. «Այս գործողությանն ինձ դրդեցին թերթերի առաջնորդողները»:

Ունկնդրության արժանացվեցին ևս չորս առանձին վկաներ

Սամասթը, որը հանցագործությունը կատարած պահին 18 տարեկանից  փոքր լինելու պատճառով դատվում է անչափահասների դատարանում, երկրորդ անգամ ցուցմունքներ տվեց վերոնշյալ դատարանին: Ստամբուլի ծանր քրեական հանցագործությունների անչափահասների երկրորդ դատարանում կայացած նիստում, որի ընթացքում ձեռնարկվել էին անվտանգության խիստ միջոցներ, լսվեցին չորս վկաներ:

Դատարանում ընթերցեց իր նամակը

Վկաներից մեկը հայտնեց, որ ինքը դեպքի վայրին մոտ գտնվող մի փողոցում հետևից երեք հոգու է տեսել, և որ այդ երեք հոգուց մեկի հագուստը նման է եղել Օգյուն Սամասթի` այդ օրվա հանդերձանքին: Ստամբուլի անչափահասների երկրորդ դատարանում դատվող Օգյուն Սամասթը իր գրած նամակը ներկայացրեց դատարանին: Սամասթը նամակում նշում էր. «Ես իմ աչքի փուշը հանել եմ, հիմա էլ թող մտածեն այդ առաջնորդողների հեղինակները: Հիմա որտե՞ղ են ինձ այս գործողությանը հասցնողները: Այն ժամանակ երակներումս պատանու արյուն էր հոսում»: Սամասթն իր նամակում հայտնում էր, թե Հրանտ Դինքի մասին տեղեկացել է թերթերի առաջին էջերում տպագրված հրապարակումների միջոցով և գրում. «Զոհաբերեցի ինձ: Մյուսներն էլ ինձ զոհաբերեցին: Ես վախենում եմ Յասին Հայալից»:

Սամասթը հայտնելով, թե Դինքի հետ հանդիպել է սպանության օրը շաբաթաթերթի խմբագրատան առջև, նաև նշում էր. «Բռունցքով մեկ-երկու հարված էի հասցնելու, բայց մտքերս խառն էին, և ինձ զոհաբերեցին: Իրական մեղավորները նրան (Դինքին) որպես հայրենիքի դավաճան ներկայացնողներն են»:

http://www.stargazete.com/politika/beni-agos-a-getirenler-nerede-haber-341815.htm