Թուրքիայում լույս է տեսել Հայկական հարցին վերաբերող հերթական խեղաթյուրումը

Թուրքիայի Եվրասիական ուսումնասիրությունների կենտրոնը (Avrasya İncelemeleri Merkezi) տեղեկացնում է, որ վերջերս պատմաբան, դոկտոր Ահմեդ Հալաչօղլուի հեղինակությամբ լույս է տեսել «Հայկական հարցը 40 հարցի միջոցով» գիրք-ուղեցույցը (“40 soruda Ermeni meselesi el kitabı”): Հեղինակը հայտարարել է, թե սույն ուղեցույցը էապես տարբերվում է Հայկական հարցի վերաբերյալ մինչ այժմ Թուրքիայում հրատարակված բոլոր գրքերից, քանի որ այն նախատեսված է ժողովրդական լայն զանգվածների համար, իսկ այս թեմայով նախկինում Թուրքիայում տպագրված գրքերի և հոդվածների մեծ մասը եղել է գիտական բնույթի:

Ահմեդ Հալաչօղլուն շեշտելով, թե «հատկապես վերջին հիսնամյակում արտասահմանցի պատմաբանների կողմից ի շահ հայերի գրված գրքերում առաջնային պլան է մղվել տվյալ օտար երկրի քաղաքական շահը», նաև ընդգծել է, որ «թուրքերը գրեթե պատասխան չեն տվել հայերի քարոզչությանը»: Ըստ թուրք պատմաբանի` այդ հանգամանքը կարող է թուրք ազգի կողմից ընկալվել որպես հանցագործի լռություն»: Հեղինակը հայտնել է, թե գիրքը գրվել է «Հայկական հարցի մասին լայն զանգվածներին տեղեկություններ հաղորդելու նկատառումով»: Որպես ելակետ են ընդունվել հակառակ կողմի տեսակետներն ու պնդումները: Ահմեդ Հալաչօղլուն նշելով, թե գրքում թեմաները ներկայացված են հարց ու պատասխանի ձևով, շեշտել է նաև, որ պատասխանները ներկայացվել են բոլոր տարիքի և մասնագիտությունների մարդկանց հասանելի կերպով:

05.04.2011