Թուրքական «Թարաֆ» օրաթերթը հայտնում է, որ Թուրքիայում առաջին անգամ Ստամբուլի Թաքսիմ հրապարակում կազմակերպված ապրիլի 24-ի ոգեկոչումից հետո այս տարի կավելանա «Այս ցավը բոլորինս է» վանկարկողների թիվը: Այս տարի նախատեսվում է ոգեկոչման արարողություն կազմակերպել հինգ նահանգներում: Ոգեկոչման արարողություններին աջակցելու է նաև «Մազլումդերը» (Մարդու իրավունքների և ճնշվածների փոխօգնության միություն):
Ցեղասպանության (Թերթում նշվում է Մեծ եղեռն արտահայտությունը-Խմբ.) սկիզբը և Ստամբուլում 235 հայ մտավորականների ձերբակալությունների օրը համարվող ապրիլի 24-ին այս տարի ինչպես Ստամբուլում, այնպես էլ Անկարայում և Իզմիրում ոգեկոչման արարողություններ են կազմակերպվելու:
Ոգեկոչման արարողությունները կազմակերպող «Ասա ոչ ռասիզմին և ազգայանականությանը» նախաձեռնության խոսնակ Ջենգիզ Ալգանը «Թարաֆ» թերթին հայտնեց, որ օրակարգում է նաև Տիգրանակերտում (Դիարբեքիր) և Բոդրումում ոգեկոչման միջոցառումներ կազմակերպելու հարցը:
Ալգանը նշելով, որ անցյալ տարվա ոգեկոչումը ևս մեկ դուռ բացեց, հիշեց, որ բոլորը` ներառյալ նաև կոչ անողները, անցյալ տարի անհանգստացած էին. «Այս տաբուն հաղթահարելուց հետո մարդիկ կամաց-կամաց ազատվում են վախից: Սպասվում է, որ այս տարի ոգեկոչման արարողությունների մասնակիցների թիվը կրկնապատկվելու է: Մասնակիցների շարքերում են լինելու Հալիլ Բերքթայը, Բասքըն Օրանը, Ահմեդ Ինսելը, Այշե Հյուրը»:
«Թարաֆ» 05.04.2011
Leave a Reply