Թուրքիայի Արտաքին գործերի նախարարությունը դատապարտել է Հայոց ցեղասպանության առնչությամբ Արգենտինայի դատարանի կայացրած որոշումը

«Անկարա» լրատվական գործակալության հաղորդմամբ` Թուրքիայի Արտգործնախարարության մամլո խոսնակը հայտարարել է, թե Թուրքիայի Արտաքին գործերի գերատեսչությունը «ափսոսանքով» է տեղեկացել Արգենտինայի դատարանի կողմից Հայոց ցեղասպանության առնչությամբ կայացրած որոշման մասին: Մամլո քարտուղարը նշել է, թե «Արգենտինայի տեղական դատարանը անտեսել է իրավունքի համաշխարհային սկզբունքները, հաշվի չի առել միջազգային պայմանագրերը, և Թուրքիայի Արտաքին գործերի նախարարությունը դատապարտում ու մերժում է այդ անլուրջ որոշումը»:

Արտգործնախարարության մամլո խոսնակը շեշտելով, թե այդ «որոշումը հայկական սփյուռքի ծայրահեղ ազգայնամոլ տարրերի ազդեցիկ եղած երկրներում իրավական համակարգի չարաշահման օրինակներից մեկն է», նաև հայտարարել է, թե դատարանի որոշումը «հակասում է ՄԱԿ-ի 1948 թ. Ցեղասպանության հանցագործության կանխարգելման և դատապարտման մասին պայմանագրին», և որ այն «ակնհայտորեն չի նպաստում Թուրքիա-Հայաստան հարաբերությունների բարելավմանը»:

Հիշեցնենք, որ արգենտինահայ Գրեգորիո Հայրապետյանը 11 տարի առաջ դիմել էր արգենտինական արդարադատությանը՝ իրավական դաշտում ապացուցելու համար, որ Առաջին աշխարհամարտի տարիներին Սվազում և Խարբերդում բնակվող իր ազգականների խեղված ճակատագրերի ողջ պատասխանատվությունը կրում է թուրքական պետությունը։

Արգենտինական դատարանն սույն թվականի ապրիլի 1-ին բավարարել էր արգենտինահայ Գրեգորիո Հայրապետյանի՝ ընդդեմ թուրքական պետության ներկայացրած հայցը: Հայտնի դատավոր Նորբերտո Օյարբիդեի կայացրած որոշման մեջ նշվում է. «Թուրքական պետությունը, 1915-1923 թթ. ծրագրված և սիստեմատիկ կերպով ոչնչացնելով 1,5 միլիոն հայ քաղաքացիների, գործել է ցեղասպանություն»։

05.04..2011