Նոր փաստեր Հրանտ Դինքի սպանության գործի առնչությամբ

Ինչպես հաղորդում է «Միլլիեթ» օրաթերթը, նախօրեին Հրանտ Դինքի սպանության գործով հերթական դատական լսման ընթացքում ընտանիքի փաստաբան Ֆեթհիե Չեթինը միջնորդություն է ներկայացրել կասկածյալ Օգյուն Սամասթի հորը որպես վկա ներգրավելու մասին: Իր միջնորդությունը Չեթինը հիմնավորել է կասկածյալի հոր ցուցմունքներով, որոնք նա տվել է ավելի վաղ Տրապիզոնի ոստիկանապետ Նեջաթ Էքիջիին: Ինչպես հաղորդվում է, Ահմեթ Սամասթը հարցաքննության ժամանակ խոսել է ժանդարմերիայի պետի հետ իր որդու կապի մասին ընդգծելով, որ որդին մի քանի անգամ եղել է նրա մոտ: «Բացի այդ, իր որդու գտնվելու վայրի մասին հարցին Ահմեթ Սամասթը պատասխանել է, որ այդ մասին ավելի լավ է հարցնել ժանդարմերիայից»,-ասվում է հաղորդման մեջ:

Ավելացնենք, որ Դինքի սպանության գործով մարտի 28-ին սկսված դատական նիստին ներկա են եղել նաև Փարիզից և Բրյուսելից ժամանած իրավաբաններ, ովքեր կհետևեն դատավարության ընթացքին: Իսկ «Դինքի բարեկամներ» խմբի 80 անդամներ լսումների օրը խաղաղ երթ են անցկացրել ի հիշատակ Հրանտ Դինքի:

29.03.2011

http://arminfo.am/armenian/politics/article/29-03-2011/10-14-00/displaypageArticleWithComment