Հայոց ցեղասպանության փաստի ժխտումը քրեականացնող օրինագիծն օրակարգ են բերում

Ֆրանսիայի խորհրդարանի ընդունած, սակայն  Թուրքիայի ճնշման տակ Սենատում սառեցված  Հայոց ցեղասպանության փաստի ժխտումը քրեականացնող օրինագիծը նորից օրակարգ է բերվել: 2012 թ. Ֆրանսիայում կայանալիք նախագահական ընտրություններին ընդառաջ Սոցիալիստական ընդդիմադիր կուսակցությունը պատրաստվում է Սենատի օրակարգ բերել Հայոց ցեղասպանության փաստի ժխտումը քրեականացնող օրինագիծը։

Թուրքական պարբերականի հետ հարցազրույցում ֆրանսիական Սենատում սոցիալիստների խմբակցության անդամները հաստատել են այդ տեղեկությունը և նշել, որ իրենց կուսակցությունը պատրաստվում է օրինագիծն օրակարգ բերել ընթացիկ տարվա մայիսի 4-ին։

Նոյեմբերին կայանալիք Սենատի ընտրություններին ընդառաջ հայկական Սփյուռքը ֆրանսիական կուսակցությունների հետ իր շփումներն ակտիվացրել է։ Հայկական Սփյուռքը տեսնելով, որ իշխանությունը Ցեղասպանության փաստի ժխտումը քրեականացնող օրինագծի առնչությամբ բացասական վերաբերմունք ունի, բանակցություններ է սկսել Սենատում սոցիալիստների խմբակցության ղեկավար Ժան Պիեռ Բելի հետ։ Իսկ Սոցիալիստական կուսակցության առաջնորդ Մարտին Օբրին հայտնել է, որ անձամբ ցուցումներ է տվել Բելին` օրինագիծը Սենատի օրակարգում ընդգրկելու վերաբերյալ։ Սպասվում է, որ նոյեմբերին կայանալիք ընտրություններից հետո Սենատում մեծամասնությունը, որը ներկայում Միություն հանուն ժողովրդական շարժման իշխող կուսակցությանն է պատկանում, անցնելու է ընդդիմադիր Սոցիալիստական կուսակցությանը:

2001 թ. Ֆրանսիայի Ազգային ժողովն ընդունել է որոշում, համաձայն որի` «Ֆրանսիան բացահայտ ճանաչում է Հայոց ցեղասպանությունը»: 2006 թ. հոկտեմբերի 12-ին  Ֆրանսիայի Ազգային ժողովը (ստորին պալատ) ընդունել է Հայոց ցեղասպանության փաստի ժխտումը քրեականացնող օրինագիծը, բայց Թուրքիայի և պատմաբանների` «պատմությունը թողեք պատմաբաններին» առարկությունների արդյունքում օրինագիծը մինչև օրս չի վավերացվել Սենատում: Սակայն օրինագիծը կրկին օրակարգ բերելու հարցում վճռական տրամադրված հայկական Սփյուռքը, անցյալ տարի սոցիալիստ և  կոմունիստ սենատորների օգտին գործունեություն ծավալելով, հաջողեց երկու նոր օրենքի առաջարկ կատարել:

Ի՞նչ է ապահովում օրենքի առաջարկը

Նախատեսվում է, որ Հայոց ցեղասպանությունը մերժողները կդատապարտվեն 5 տարվա ազատազրկման և կտուգանվեն 45 հազար եվրոյով: Բացի այդ, օրենքի առաջարկով նախատեսվում է իրավասություն տալ կազմակերպություններին` մեղադրանք ներկայացնելու օրենքը խախտողների նկատմամբ, ինչպես նաև` մամուլի մասին օրենքին ավելացնել մեկ դրույթ, որի համաձայն` պատիժ կսահմանվի նաև նրանց նկատմամբ, ովքեր փորձում են զանգվածային լրատվամիջոցների միջոցով ժխտել Հայոց ցեղասպանությունը:

Արզու Չաքըր Մորին

Փարիզ 31.03.2011

http://hurarsiv.hurriyet.com.tr/goster/ShowNew.aspx?id=17419689