Սոներ Յալչընը դասակարգել է հայ քաղաքացիներին և աշիրեթները

Էրգենեքոնի գործի հետաքննության շրջանակներում Oda TV հեռուստաընկերությունում կատարված խուզարկության ժամանակ գտնված մի թղթապանակում բացահայտվեցին Թուրքիայի հայ քաղաքացիների տվյալները:

Oda TV հեռուստաընկերությունում իրականացված գործողությունից հետո՝ 2011 թ. փետրվարի 17-ին, դատախազ Զեքերիա Օզը ցուցմունքներ է վերցրել Յալչընից: Դատախազը հետևյալ հարցն է ուղղել Յալչընին. «Oda TV հեռուստաընկերությունում կատարված խուզարկության ժամանակ կիսափակ ստվարաթղթե թղթապանակ է գտնվել, թղթապանակի վրա գրված է եղել «Դիարբեքիր նահանգի Լիջե գավառում բնակվող հայ քաղաքացիների գրանցումների պատճենները», և թղթապանակում նշված են եղել բազմաթիվ անձանց գրանցումների մասին տեղեկություններ: Որտեղի՞ց եք ձեռք բերել դրանք: Ի՞նչ նպատակով եք թաքցնում: Բացատրե’ք»:

Յալչընն ընդունելով, որ բազմաթիվ հայ քաղաքացիների վերաբերյալ գրանցման տեղեկությունները ինքն է հավաքել, հետևյալ պատասխանն է տվել դատախազի վերոնշյալ հարցին. «Երբ 1996 թ. Բեհչեթ Ջանթյուրքի հիշողությունների մասին գիրք էի գրում, վերջինիս մոտ կային թե’ Ազգային հետախուզական կազմակերպության (MİT), թե’ Անվտանգության և թե’ դատական արձանագրություններ: Ձեր ասած փաստաթուղթը, կարծում եմ, առնչվում է այդ դատական գործի արձանագրությունների հետ, որովհետև Բեհչեթ Ջանթյուրքի մայրը հայ էր: Նա համագործակցում էր ԱՍԱԼԼԱ-ի հետ, դրա համար ես էլ այդ տեղեկությունը ձեռք էի բերել` նրա ազգականների առնչությամբ»:

Oda TV հեռուստաընկերությունում կատարված խուզարկության ժամանակ, հեռուստատեսություն, որի տերն է Սոներ Յալչընը, գտնվել է նաև մեկ այլ թղթապանակ, որի վրա ձեռագրով նշված է եղել «ՇԱՏ ԳԱՂՏՆԻ. ՊԵՏՈՒԹՅԱՆ ԱՆԼԵԳԱԼ ՀՐԱՊԱՐԱԿՈՒՄՆԵՐԸ», և որի էջերում զանազան տեղեկություններ են եղել Թուրքիայի տարբեր վիլայեթներում գտնվող տասնյակ աշիրեթների (ցեղերի) վերաբերյալ: Դատախազ Օզը կասկածյալ Յալչընից ցուցմունքներ վերցնելիս հարցնում է նաև վերոհիշյալ աշիրեթների մասին: Յալչընն էլ ասում է, թե խոսքի առարկա հանդիսացող թղթապանակում նշված տեղեկություններին ինքը հասու է դարձել «Դողրու» ամսագրից, որում մոտ 2000 թ. տպագրվել են այդ աշիրեթների մասին տվյալները, և որ դրանք նաև հրատարակվել են որպես գիրք:

Յալչընի հարցաքննության ժամանակ դատախազը հարցրել է նաև Oda TV հեռուստաընկերությունում կատարված խուզարկության ընթացքում գտնված մի հեռախոսագրքույկում նշված “DHKC BRÜKSEL” արտահայտության մասին, որի դիմաց գրված է եղել արտասահմանյան երկրի մի հեռախոսահամար: Յալչընն այդ հարցին պատասխանել է, թե տեղեկություն չունի:

Դերվիշ Գենչ

29.03.2011

http://www.zaman.com.tr/haber.do?haberno=1114611