Պետխորհուրդը գործում է Փոքրամասնությունների լրացուցիչ հանձնաժողովի գործելաոճով

Տարիներ ի վեր վաքըֆի կարգավիճակ ստանալու համար իրավական պայքար մղող Սուրբ Խաչ վարժարանը Պետխորհրդից վատ լուրեր ստացավ: Պետխորհրդի դատական վարչության խորհուրդը ձայների մեծամասնությամբ չեղյալ հայտարարեց  Պետխորհրդի 10-րդ վարչության քննարկմանը դրված որոշումը առ այն, որ Սուրբ Խաչ հայկական վարժարանի վաքըֆը կազմավորվել է որպես համայնքային վաքըֆ և դեռևս նույն կարգավիճակն ունի: Վաքըֆի փաստաբանները` Սեպուհ Ասլանգիլը, Լուիզ Բաքարը և Սեդրակ Դավութհանը, որոշումը վերականգնելու համար պատրաստվում են հայցադիմում ներկայացնել:

Սուրբ Խաչ Դպրեվանքի ղեկավար Հակոբ Քիրքորյանը հայտնելով, որ վաքըֆի կարգավիճակից սկիզբ առնող անորոշությունը լուրջ դժվարություններ է առաջացնում, ասաց. «Կրթության նախարարությունը դպրոց ուսուցիչ է ուղարկում, Ֆինանսների նախարարությունը մեզ ճանաչում է, վճարում ենք մեր հարկերը, սակայն Վաքըվների գլխավոր վարչությունը մեզ չի ճանաչում: Վաքըֆների ցուցակում մենք չկանք: 10-րդ վարչության որոշման համաձայն` պետք է, որ ցուցակում լինեինք: Այս պահին մենք չենք ընդունվում որպես վաքըֆ, որի պատճառով չենք կարողանում նաև ընտրություն անցկացնել: Բացի այդ՝ այս պահին չենք կարողանում տնօրինել նաև ունեցվածքը»:

Լրացուցիչ հանձնաժողովի հետքերը

Սուրբ Խաչ հայկական վարժարանի վաքըֆում, որտեղ մինչև 1981 թ. ղեկավար ընտրվել է ընտրությունների արդյունքում և Ստամբուլի նահանգապետարանի կողմից արձանագրություններ են տրվել, 1985 թ. իրավիճակը կտրուկ փոխվել է: 1985 թ. հետո չորս տարին մեկ անգամ կատարվող ընդհանուր համայնքային վաքըֆների ընտրությունների ժամանակ, եթե Սուրբ Խաչ հայկական վարժարանի վաքըֆը դիմում է մյուս վաքըֆների հետ ընտրություն անցկացնելու համար, նահանգապետարանն ամեն անգամ այս դիմումները հետ է ուղարկում, իսկ ընտրությունը` հետաձգում: Իսկ վերջում հավատարմատար նշանակվեց: Այս ընթացքում դպրոցն առանց ընդմիջումների շարունակեց իր գործունեությունը: Որպես վաքըֆ չճանաչվող պրոցը Կրթության նախարարությունը շարունակում է ուսուցիչ և տնօրենի օգնական ուղարկել: Ֆինանսների նախարարությունը Սուրբ Խաչ վարժարանի աշխատողների ապահովագրությունը դպրոցից է ապահովել:

Իսկ 2003 համայնքային վաքըֆների նկատմամբ հետաքրքրություն ցուցաբերած ղեկավարության շրջանակում երկու անշարժ գույքը թափուում գրանցելու դիմում ներկայացրած Սուրբ Խաչ վարժարանի դիմումը հետ են ուղարկել, քանի որ վաքըֆի անունը «տեղ չի գտնում համայնքային վաքըֆների ցուցակում»: Սրա վերաբերյալ վաքըֆի կարգավիճակի անորոշությունը տեղափոխվեց դատարան:

Դատարանի թղթապանակում տեսնում ենք անցյալում ոչ մուսուլման համայնքների նկատմամբ որպես խտրական կիրառումների կենտրոն գործող   Փոքրամասնությունների լրացուցիչ հանձնաժողովի հետքերը: Հայտնի դարձավ, որ 1962 թ. գաղտնի շրջբերականով ստեղծված այս հանձնաժողովը, որը «ի պաշտոնե հետևում էր փոքրամասնությունների՝ ազգային անվտանգությանը հակասող գործողություններին», Սուրբ Խաչ հայկական վարժարանի վաքըֆի դեմ որոշում է կայացրել: Դատական գործում կողմ հանդիսացող Վաքըֆների գլխավոր վարչությունը պաշտպանեց այն տեսակետը, որ անհրաժեշտ է` Սուրբ Խաչ վարժարանը ղեկավարի Փոքրամասնությունների լրացուցիչ հանձնաժողովի երաշխավորությամբ նշանակված հավատարմատարը:

 Դատական գործին հետևող 10-րդ վարչությունն ընդունեց որոշում, որի համաձայն` Սուրբ Խաչ հայկական վարժարանի վաքըֆը կազմավորվել է որպես համայնքային վաքըֆ և դեռևս նույն կարգավիճակն ունի: Վաքըֆների գլխավոր վարչությունը որոշումը վիճարկելու համար դիմել է Պետխորհրդի դատական վարչության խորհրդին: Խորհուրդը Սուրբ Խաչ վարժարանի դեմ որոշում է կայացրել: Խորհրդի որոշումն անցյալ շաբաթ պաշտոնապես հայտարարվեց:

Սահակ Գյուրյան

«Ակօս», թիվ 781

25.03.2011