Արտաքուստ դրական, իսկ իրականում` վտանգավոր

«Վերջին տասնամյակների ընթացքում առաջին դեպքն է, երբ Թուրքիայի` Պոլսի հայ համայնքի ներկայացուցիչներին հնարավորություն է տրվում իրենց թեկնածությունները ներկայացնել խորհրդարանական ընտրություններին»,-mardik.am-ի հետ զրույցում նշեց Հայաստանի գիտությունների ազգային ակադեմիայի Արևելագիտության ինստիտուտի տնօրեն Ռուբեն Սաֆրաստյանը: Այդ առումով, ըստ նրա, դա դրական երևույթ է: «Սակայն մյուս կողմից, երբ մենք ավելի ենք խորանում այդ երևույթի մեջ, տեսնում ենք որոշ խնդիրներ, հարցեր, որոնք պետք է մենք ավելի լավ ուսումնասիրենք»,-նշեց նա: 

 Ըստ թուրքագետի` առաջին խնդիրն այն է, որ տարբեր կուսակցությունների կողմից են ներկայացվում հայազգի թեկնածուները: «Սա մտավախություն է առաջացնում, քանի որ առանց այն էլ պոլսահայ համայնքն ունի բավական խնդիրներ, բաղկացած է տարբեր խմբերից, տարբեր շահեր ունեցող խմբավորումներից: Այս դեպքում ևս կարծես թե մտնելու է հակասությունների նոր փուլ: Այս անգամ արդեն թուրքական քաղաքական կուսակցություններին հատուկ հակասություններն են տեղափոխվելու համայնքային կյանք: Ես կարծում եմ, որ սա վտանգավոր երևույթ կարող է լինել»,-ընդգծեց թուրքագետը: 

Երկրորդ խնդիրը, Ռ.Սաֆրաստյանի կարծիքով, այն է, որ հայ պատգամավորների թեկնածուների մեծ մասն ուղղակի չի ընտրվի: «Ի վերջո, պոլսահայ համայնքը կարող է հայտնվել կոտրած տաշտակի առջև: Այս ամենը` պայքարը, հակասությունները, կավարտվեն նրանով, որ ոչ մի հայ պատգամավոր չի լինի Թուրքիայի խորհրդարանում»,-նշեց Հայաստանի գիտությունների ազգային ակադեմիայի Արևելագիտության ինստիտուտի տնօրենը:

Նրա գնահատմամբ` պետք է հաշվի առնել նաև այն հանգամանքը, որ եթե նույնիսկ մեկ հայ պատգամավոր ընտրվի որևէ կուսակցության կողմից, ապա դա ոչ մի հնարավորություն չի ընձեռի պոլսահայ համայնքին պաշտպանելու իր իրավունքները` որպես կրոնական, որպես ազգային փոքրամասնություն:

«Այսպիսով, ես կարծում եմ, որ դա չնայած արտաքուստ դրական քայլ է երևում, սակայն իրականում ոչ մի օգուտ հայ համայնքին չի բերի: Դա կարող է վնաս բերել այն առումով, որ կարող է ուժեղացնել հայերի միջև պառակտումը»,-ասաց նա: 

Ըստ թուրքագետի` այդ հնարավորությունը հայ համայնքին տրվեց նրա համար, որ Թուրքիան ուզում է Եվրոպայի աչքում երևալ որպես եվրոպական արժեքներին հետևող, ազգային կրոնական փոքրամասնությունների իրավունքների մասին մտածող պետություն: 

http://mardik.am/am/news/category_category_1282302066/article_14042