ԵՐԶՆԿԱ. գավառ

ԵՐԶՆԿԱՅԻ գավառ, Արզնկյան, Եզնկա, Երզինճյան, Երզինջան, Երզնջան, Երիզահան, էրզինկյան, էրզինճան, Էրզինճյան, էրզինջան, էրզնգան. գավառ (սանջակ), օկրուգ Արևմտյան Հայաստանում` Էրզրումի նահանգում: Ընդգրկում էր Երզնկայիի, Ռեֆայիեի, Ղուրուչայի, Կամախի, Բաբերդի և Սպերի գավառակները: Կենտրոնը Երզնկա քաղաքն էր:

1877—78 թթ. ուներ 1174 գյուղ, որոնք բոլորը միասին ունեին 23962 տուն, 6840-ը՝ թուրքական, 2465-ը՝ քրդական, 6190-ը՝ ղզլբաշական, 8237-ը՝ հայկական, իսկ 230-ը՝ հունական: 180374 բնակիչներից 76220-ը հայեր էին: 1909-ին Երզնկայի գավառի բնակչության թիվը հասնում էր 210858-ի, որից 34510-ը՝ հայեր:

1903–ին այստեղ կար 11 վանք և 33 գործող ու կանգուն եկեղեցի: Ունի բերրի հողեր, բնական զանազան հումքեր, հորդաբուխ ջերմուկներ:

Հայերը, երկրագործությունից բացի, զբաղվում էին նաև արհեստներով ու առևտրով: Նրանց մեծագույն մասը (25500 մարդ) 1915-ին ոչնչացվեց կամ դուրս մղվեց իր հայրենի գավառից ցեղասպան երիտթուրքերի կողմից: