Ըստ “Սաբահ” օրաթերթի` Թուրքիայի արտաքին գործերի նախարար Ահմեդ Դավութօղլուն, մասնակցելով “Թյուրք օջաքլարը” ազգայնական կազմակերպության ստամբուլյան մասնաճյուղի կողմից կազմակերպված “Դեպի մեծ Թուրքիա” սիմպոզիումին, իր ելույթում շեշտել է Հայկական հարցի հետ հաշվի նստելու անհրաժեշտության մասին: Դավութօղլուն ասել է. “2015 թ. Հայկական հարցի գլխավորությամբ մեզ հետ պատմական հաշիվներ ունեցողների առերեսման տարի է լինելու: Մենք ապագան կառուցելու համար դարի հաշիվը պետք է անենք իրոք ճիշտ հիմքերի վրա: Ոչ միայն որպես “Թյուրք օջաքլարը” կազմակերպություն, այլև ազգովին կանգնած ենք դարի մարտահրավերները, ընձեռած նոր հնարավորություններն ու ռիսկերը գնահատելու անհրաժեշտության առջև”: Ընդգծելով, որ 1911 թ.` ուղիղ 100 տարի առաջ “մուստաֆա փաշաներն ու էնվեր բեյերը Տրիպոլիի պատերազմի ժամանակ պաշտպանել են հայրենի հողը”, Թուրքիայի արտաքին գերատեսչության ղեկավարը նաև նշել է. “Մենք համոզված ենք, որ դարձյալ սուբյեկտ ենք դառնալու պատմության մեջ: Կարող է և հանդիպենք դժվարությունների, սակայն պատմության ընթացքում երբեք պասիվ տարր չենք եղել, չենք էլ լինի: Մեր նպատակն է, բառիս բուն իմաստով, ամբողջանալ մեր հարևան տարածաշրջանների և երկրների հետ: Մենք ցանկանում ենք քանդել մեր միջև եղած հոգեբանական պատնեշները, բնականոնացնել պատմությունը, միավորել մեր տնտեսությունները, ունենալ ամենաբարձր մակարդակով քաղաքական շփումներ: Թուրքիան լինելու է բոլոր միջազգային կազմակերպությունների անդամ, քանի որ այլևս չենք ուզում, որ մեր երկիրը մնա տարածաշրջանի սահմաններում, իսկ դրա կվինտ-էսենցիան թուրքերի վերադարձն է իրենց փառապանծ պատմությանը”:
26.03.2011
Սաբահ
Leave a Reply