Ինչպես հայտնում է Ասորիների ցեղասպանության ուսումնասիրության կենտրոնը, Գերմանիայի Գյութերսլոհ (Gütersloh) քաղաքում գործող Ասորեստան-Միջագետք կազմակերպությունը մարտի 12-ին` շաբաթ օրը, կազմակերպել է գիտաժողով, որին մասնակցել է հայտնի թուրք գրող Քեմալ Յալչընը, ով տարբեր լեզուներով հրատարակված բազմաթիվ գրքերի հեղինակ է: 100 հոգու մասնակցությամբ գիտաժողովը տևել է 3 ժամ: Գիտաժողովին բարձրաստիճան պաշտոնյաների հետ մեկտեղ մասնակցել են նաև Գյութերսլոհի Ալևիական միության ներկայացուցիչներ, Die Linke ձախակողմյան կուսակցության պատգամավոր Ալի Քաթալանը:
Բացման խոսքով հանդես է եկել Seyfo (Ասորիների ցեղասպանության ուսումնասիության կենտրոն) կենտրոնի ներկայացուցիչ Սաբրի Աթմանը, ով, իր կարճ ելույթի ժամանակ խոսելով Seyfo կենտրոնում կատարված վերջին աշխատանքների և զարգացումների մասին, ողջունել է Քեմալ Յալչընին և խոսքը փոխանցել նրան:
Յալչընն իր լույթն սկսել է՝ ունկնդիրներին կոչ անելով մեկ րոպե լռությամբ հարգել ինչպես ասորիների ցեղասպանության ժամանակ, այնպես էլ վերջին օրերին Ճապոնիայում երկրաշարժի պատճառով զոհվածների հիշատակը:
Այնուհետև շարունակելով ելույթը` ասել է, որ Առաջին համաշխարհային պատերազմի ժամանակ ասորիների, հայերի, ալևիների և եզդիների հետ տեղի ունեցածը «բառիս բուն իմաստով ցեղասպանություն էր»: Յալչընը նաև շեշտել է, որ պատմությունից պետք է դասեր քաղել` չմոռանալով այն:
Leave a Reply