Տոհմածառի մասին ստի տակից դուրս եկավ Oda TV հեռուստատեսության և Յալչըն Քյուչյուքի միջև առնչությունը

Էրգենեքոնի գործի երրորդ մեղադրական ակտում տեղ են գտել ուշագրավ մանրամասներ, ըստ որոնց` ենթադրվում է, թե Յալչըն Քյուչյուքը Oda TV հեռուստատեսության գլխավոր խմբագիր Բարըշ Փեհլիվանին հրահանգել է հեռուստատեսությամբ հաղորդել, թե նախագահ Աբդուլլահ Գյուլը հայ է:

Փեհլիվանը հեռախոսազրույցում ասում է Քյուչյուքին. «(Ջանան) Արըթմանի «Գյուլի մայրը հայ է» խոսքից հետո Սոներ բեյը մի տոհմածառ էր հանել տվել, թերևս կհիշեք: Մտանք այդ լուրի մեջ (Oda TV հեռուստաընկերության կայքէջում)», իսկ Քյուչյուքը տալիս է հետևյալ պատասխանը. «Ես էլ եմ Ձեզ այդ հարցով զանգահարել: Սոների հետ էլ եմ զրուցել»:

Էրգենեքոնի գործի հետաքննության շրջանակներում ձերբակալվել էին Oda TV հեռուստատեսության տնօրեն Սոներ Յալչընը, գլխավոր խմբագիր Բարըշ Փեհլիվանը և Էրգենեքոնի գործով մեղադրյալներից դոկտոր, պրոֆեսոր Յալչըն Քյուչյուքը: Oda TV հեռուստաընկերությունում գտնված փաստաթղթերում տեղեկություններ են հանդիպում, ըստ որոնց` Յալչըն Քյուչյուքը Էրգենեքոն կազմակերպության նպատակների ուղղությամբ ԶԼՄ-ների միջոցով ապատեղեկատվություն էր տարածել: Էրգենեքոնի գործի երրորդ մեղադրական ակտում էլ տեղ էր գտել մի ուշագրավ մանրամասն, որում ցույց էին տրվում Յալչըն Քյուչյուքի և Oda TV հեռուստաընկերության միջև եղած հարաբերությունները: Պնդվում է, թե Քյուչյուքը 2008 թ. դեկտեմբեր ամսին զանգահարել է Oda TV հեռուստաընկերության գլխավոր խմբագիր Բարըշ Փեհլիվանին և վերջինիս ուղղորդել ու հրահանգներ է տվել` նախագահ Աբդուլլահ Գյուլի տոհմածառի վերաբերյալ հաղորդումներ հրապարակելու ուղղությամբ:

Դատարանի որոշմամբ իրականացված տեխնիկական հետաքննության շնորհիվ բացահայտված հեռախոսազրույցում Բարըշ Փեհլիվանն ասում է Քյուչյուքին. «(Ջանան) Արըթմանի «Գյուլի մայրը հայ է» խոսքից հետո Սոներ բեյը մի տոհմածառ էր հանել տվել, թերևս կհիշեք: Մտանք այդ լուրի մեջ (Oda TV հեռուստաընկերության կայքէջում)»: Քյուչյուքն էլ պատասխանում է. «Ես էլ հենց այդ հարցով եմ Ձեզ զանգահարել, ավելի ճիշտ` մատնանշել: Հանդիպեք նաև Սոների հետ: Մի անգամ Ձեզ հարցրել էի, թե արդյոք միջամտելու եք այդ գործին: Եթե այո, ապա ինձ զանգահարեք 15-20 րոպե անց»: Յալչըն Քյուչյուքը, շարունակելով զրույցը, հիշեցնում է իր հեղինակած «Մենաշնորհ-2» վերնագրով գրքում Գյուլի` «սաբաթայական» լինելու վերաբերյալ հոդվածը: Նա խնդրում է, որ օգտագործվի նաև Գյուլի այն նամակը, որ վերջինս իրեն էր ուղարկել վերոհիշյալ հոդվածի հրապարակումից անմիջապես հետո, և որում նշվում էր, թե գրքում տեղ գտած պնդումները ճիշտ չեն: Նույն զրույցի ժամանակ Քյուչյուքն ասում է. «Դրանից հետո ինձ մոտ այլ տեղեկություններ կան: Մեկ էլ` շատ կատեգորիկ եմ ասելու: Թուրքիայում հայ ծագում ունեցող ոչ մի անձ չի կարող նախագահ կամ վարչապետ դառնալ: Մեկ էլ Սոներ Յալչընի հետ խոսե’ք»:

Այն օրը, երբ տեղի է ունեցել Քյուչյուքի և Փեհլիվանի միջև հեռախոսազրույցը, այսինքն` 2008 թ. դեկտեմբերի 18-ին, ուշադրություն է գրավում Oda TV հեռուստաընկերության կայքէջում հրապարակված «Նախագահ Գյուլի մայրը հա՞յ է, թե՞ ոչ» վերնագրով հրապարակումը, որում ներկայացվում է Ժողովրդահանրապետական կուսակցության անդամ Ջանան Արըթմանի սկսած քննարկումը: Այն բանից հետո, երբ թեմայի վերաբերյալ քննարկումները շարունակվում են, նախագահը մամուլին է ուղարկում իր տոհմածառի մասին նամակը և հայտնում իր գերդաստանի` թուրք և մուսուլման լինելու մասին: Այս հայտարարությունից անմիջապես հետո` 2008 թ. դեկտեմբերի 22-ին, Oda TV հեռուստաընկերության կայքէջում հրապարակվում է մի նոր տեղեկություն: Այս լուրում, որը կրում էր «Ի՞նչն է նախագահ Գյուլը թերի թողել իր տված պատասխանում» վերնագիրը, ուշադրություն են գրավում Գյուլի հայտարարության` ոչ բավարար լինելու մասին արտահայտությունները: Այն, որ նախագահ Գյուլի` տոհմածառի վերաբերյալ տեղեկությունները համառորեն շարունակում են հրապարակվել, ցույց է տալիս, որ Յալչըն Քյուչյուքն ընդունել է քննարկումը շարունակել տալու խորհուրդները: Նախագահի տոհմածառի մասին առաջին քննարկումը սկսվել էր նախագահական ընտրություններից առաջ` 2007 թ. օգոստոսին, Սոներ Յալչընի հոդվածով, և այնուհետև շարունակվել էր Ժողովրդահանրապետական կուսակցության անդամ Ջանան Արըթմանի շնորհիվ: Հոդվածի հրապարակման օրերին վաճառքի հանված «Մովսեսի վարդը» վերնագրով գրքում ևս, որը վերաբերում է Էրգենեքոնի գործով ձերբակալված Էրգուն Փոյրազին, տեղ էին գտել նախագահի տոհմի մասին սուտ պնդումներ:

Մուստաֆա Գյուրլեք

16.03.2011

http://www.zaman.com.tr/haber.do?haberno=1107994