Ցեղապաշտության ենթարկված հայ քաղաքացին դիմում է Մարդու իրավունքների եվրոպական դատարան

Հայ քաղաքացի Ջևադ Սինեթը, ով հաշմանդամության համար քարտ ստանալու նպատակով դիմել էր Բաթմանի Սոցիալական ծառայությունների նահանգային վարչություն, և այստեղի պաշտոնյան մերժել էր նրան՝ ասելով, թե «Դու հայ ես, անձնագրումդ գրված է քրիստոնյա, հետևաբար` մենք չենք կարող քեզ հաշմանդամության քարտ տրամադրել», երկրի ներսում չկարողանալով իր իրավունքները պաշտպանել` պատրաստվում է Թուրքիայի դեմ բողոքել Մարդու իրավունքների եվրոպական դատարանում:

Բաթմանի կենտրոնական Փեթրոլքենթ թաղամասում բնակվող հաշմանդամ հայ քաղաքացի Ջևադ Սինեթը (32) հաշմանդամության մասին քարտ ստանալու համար 2010 թ. սեպտեմբերի 21-ին դիմել էր Սոցիալական ծառայությունների նահանգային վարչություն, իսկ այստեղի պաշտոնյան նրան մերժել էր՝ ասելով, թե «Դու հայ ես, քո անձնագրում գրված է քրիստոնյա, հետևաբար` մենք չենք կարող քեզ հաշմանդամության քարտ տրամադրել»: Քարտ ստանալ չկարողացած Սինեթը պետական հաստատությունում ռասիստական վերաբերմունքի ենթարկվելու պատճառով դիմել է դատարան և դատական գործ հարուցել Բաթմանի հանրապետական դատախազության պաշտոնյայի դեմ: Այս դեպքից հետո Սինեթը իրավաբանական աջակցություն ստանալու համար դիմել է նաև Մարդու իրավունքների կազմակերպություն և դատական գործ հարուցել Բաթմանի հանրապետական դատախազության պաշտոնյայի դեմ:

Դատախազությունը հանցանքը հաստատող որևէ բան չի գտել

6 ամիս հետո դատախազությունը Սինեթի դիմումի վերաբերյալ վճռել է գործին ընթացք չտալ`«հետապանդման կարիք չկա» հիմքով: Չնայած դատախազության այս որոշմանը` Սինեթը, որը վճռական է տրամադրված այս գործին ընթացք տալու առումով, իր դատապաշտպանի միջոցով դիմել է Մարդինի ծանր հանցագործությունների քրեական դատարան և առարկել դատախազության որոշման դեմ: Սակայն այս առարկությունը նույնպես մերժվել է դատարանի կողմից: Քանի որ իր բոլոր դիմումներն անարդյունք են մնացել, Սինեթը, երկրի ներսում չկարողանալով իր իրավունքները պաշտպանել, որոշել է դիմել Մարդու իրավունքների եվրոպական դատարան` որպես քաղաքացի անարդարության ենթարկված լինելու մեղադրանքով:

Սինեթն առաջիկա օրերին բողոքելու է Մարդու իրավունքների եվրոպական դատարան` այն մեղադրանքով, թե Թուրքիան անպատիժ է մնում ռասիստական դրսևորումների համար:

14.03.2011

http://www.evrensel.net/news.php?id=1965